زەينەتاقى راسىمدەۋ تۋرالى وتىنىشتەر ەلەكتروندى نۇسقادا قابىلداناتىن بولادى
بۇل تۋرالى بۇگىن سەنات دەپۋتاتتارىمەن كەزدەسۋ بارىسىندا «ءبىرىڭعاي جيناقتاۋشى زەينەتاقى قورى» ا ق باسقارما ءتوراعاسى رۋسلان ەردەنايەۆ وسىلاي ءمالىم ەتتى.
باسقارما ءتوراعاسىنىڭ ايتۋىنشا، ب ج ز ق كورپوراتيۆتىك ستراتەگياسىنا سايكەس، ەڭ ءبىرىنشى كەزەكتە زەينەتاقى قىزمەتتەرىنىڭ ساپاسىن ارتتىرىپ، ونى وزىق حالىقارالىق ستاندارتتارعا جەتكىزۋ ماسەلەسى قويىلىپ وتىر. وسى مىندەتتەر اياسىندا ەلەكتروندىق قىزمەت كورسەتۋدى دامىتۋ كوزدەلەدى.
«وسىعان بايلانىستى، شوتتاردى اشۋعا، رەكۆيزيتتەردى وزگەرتۋگە وتىنىمدەر بەرۋدى، زەينەتاقى تولەمدەرىن راسىمدەۋدى ەلەكتروندىق ساندىق قولتاڭبانى پايدالانا وتىرىپ، ينتەرنەت ارقىلى ەلەكتروندى نۇسقادا جۇزەگە اسرۋدى ۇسىنامىز. وسىلايشا، سالىمشى قورعا قايتا-قايتا بارا بەرمەي، كەرىسىنشە قور سالىمشى ءۇشىن جايلى جاعدايلار جاساۋعا تىرىسادى. ماسەلەن، الداعى ۋاقىتتا زەينەتاقى جاسىنا جەتكەن ازاماتتارعا ولاردىڭ ءوتىنىش بەرمەگەنىنە قاراماستان اۆتوماتتى تۇردە تولەمدەر اۋدارۋ ۇسىنىلادى»، - دەيدى ب ج ز ق باسشىسى.
ونىڭ ايتۋىنشا، بۇل ءۇشىن زەينەتاقى تولەمىن الۋشىعا قاتىستى ءارتۇرلى مەملەكەتتىك مالىمەتتەر بازاسىنىڭ ۇيلەسىمدى جۇمىسىن قامتاماسىز ەتۋ شارت. «بۇدان بولەك، ءبىز الداعى ۋاقىتتا حالىقپەن ءوزارا كەرى بايلانىستى مەيلىنشە دامىتۋدى جولعا قويامىز. ەرىكتى زەينەتاقى جيناقتارىن قالىپتاستىرۋ مادەنيەتىن دامىتۋ بويىنشا جۇمىس ىستەيمىز. الەمدىك وزىق تاجىريبەلەردى ەسكەرە وتىرىپ، جەكە جانە كاسىبي كورپوراتيۆتىك جوسپارلاردى ازىرلەۋمەن اينالىساتىن بولامىز»، - دەدى ر. ەردەنايەۆ.
اۆتور: قانات مامەتقازى ۇلى
