ا. مامىتبەكوۆ ازىق-تۇلىك قاۋىپسىزدىگى جونىندەگى يسلام ۇيىمىنىڭ مىندەتتەرىن اتادى

استانا. قازاقپارات - يسلام ىنتىماقتاستىعى ۇيىمىنا مۇشە ەلدەر ءۇشىن ءبىرىڭعاي «حالال» ستاندارتتارىن ازىرلەۋ قاجەت.

بۇل تۋرالى بۇگىن ازىق-تۇلىك قاۋىپسىزدىگى جانە اۋىل شارۋاشىلىعىن دامىتۋ جونىندەگى يسلام ىنتىماقتاستىعى ۇيىمى مينيسترلەرى كونفەرەنتسياسىنىڭ 7- سەسسياسىندا ق ر اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.

«ءبىزدىڭ ەلىمىز ازىق-تۇلىك قاۋىپسىزدىگى جونىندەگى يسلام ۇيىمىنىڭ مىندەتتەرى رەتىندە مىنالاردى ۇسىنادى: ەلدەرىمىزدىڭ تابيعي-كليماتتىق جاعدايلارىنا جانە گەوگرافيالىق ورنالاسۋىنا سۇيەنە وتىرىپ، ەلارالىق ماماندانۋدى ايقىنداۋ. وسى ماماندانۋعا سۇيەنە وتىرىپ، ءبىز ساۋدالىق تەكەتىرەستەر جۇرگىزۋدى توقتاتۋعا، سونداي-اق حالقىمىزدى ەكونوميكالىق تۇرعىدان بارىنشا قولجەتىمدى ازىق-تۇلىكپەن قامتاماسىز ەتۋگە مۇمكىندىك الامىز»، - دەدى مينيستر.

سونىمەن قاتار ا. مامىتبەكوۆ يسلام ىنتىماقتاستىعى ۇيىمىنا مۇشە ەلدەرگە ازىق-تۇلىك جەتكىزۋ شىعىندارىن مەيلىنشە ازايتۋعا مۇمكىندىك بەرەتىن بارىنشا ءتيىمدى كولىك-لوگيستيكالىق باعدارلار قۇرۋ قاجەتتىگىن اتاپ ءوتتى.

«بىرلەسكەن ازىق-تۇلىك قورلارىن قالىپتاستىرۋ جانە باسقارۋ ەسەبىنەن ازىق-تۇلىك باعالارىن تۇراقتاندىرۋ؛ مۇقتاج ەلدەرگە ازىق-تۇلىك كومەگىن كورسەتۋ؛ اۋىل شارۋاشىلىعىن دامىتۋ جانە ازىق-تۇلىك قاۋىپسىزدىگىن قامتاماسىز ەتۋ ءۇشىن يسلامدىق قارجىلاندىرۋ قۇرالدارىن پايدالانۋ؛ يسلام ىنتىماقتاستىعى ۇيىمىنا مۇشە ەلدەر ءۇشىن ءبىرىڭعاي «حالال» ستاندارتتارىن ازىرلەۋ، سونداي-اق ۇلتتىق ستاندارتتار بويىنشا وندىرىلگەن ءونىمنىڭ بالامالىلىعىن تانۋ جۇيەسىن قۇرۋ بويىنشا جۇمىستى جانداندىرۋ؛ اۋىل شارۋاشىلىعىن دامىتۋعا باعىتتالعان بىرلەسكەن عىلىمي زەرتتەۋلەر جۇرگىزۋ دە ۇيىمنىڭ مىندەتتەرى بولۋى قاجەت»، - دەدى ا. مامىتبەكوۆ.

اۆتور: مارلان جيەمباي