الەمدىك برەندتىڭ جاساندى اياق كيىمدەرىن قازاقستانعا اكەلۋگە توسقاۋىل قويىلدى

الماتى. قازاقپارات - الماتى قالاسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى الماتى حالىقارالىق اۋەجايىندا تاۋارلاردى كەدەندىك تەكسەرۋدەن وتكىزۋ بارىسىندا زياتكەرلىك مەنشىك قۇقىعىنىڭ بۇزىلۋ دەرەگىن انىقتادى.

ياعني، سىرتقى ەكونوميكالىق قىزمەتپەن اينالىسۋشى كاسىپكەر تاۋارلاردى قازاقستانعا زياتكەرلىك مەنشىك قۇقىعىن بۇزا وتىرىپ اكەلگەن. بۇل تۋرالى بۇگىن الماتى قالاسى بويىنشا مەملەكەتتىك كىرىستەر دەپارتامەنتىنىڭ باسپا ءسوز قىزمەتىنەن حابارلادى.

تاۋارلار بويىنشا ۇسىنىلعان دەكلاراتسياعا سايكەس، قازاقستان رەسپۋبليكاسىنا اكەلۋگە ارنالعان مالىمدەمەدە مودەلى مەن ولشەمدەرى ءارقالاي «اياق كيىم، ساندال (سۇيرەتپە)» دەپ كورسەتىلگەن. ال تاۋارلاردى جونەلتۋشى ەل - تۇركيا. الايدا، جالپى سالماعى 2 تونناعا جۋىق بولاتىن، «ADIDAS» جانە «REEBOK» تاۋار بەلگىلەرى جازىلعان سپورتتىق اياق-كيىمدەر قازاقستانعا قۇقىق يەسى تاراپىنان بەرىلەتىن ءتيىستى قۇجاتتارسىز جەتكىزىلگەن.

قولدانىستاعى زاڭناماعا سايكەس، مۇنداي تاۋارلاردى شىعارۋ 10 جۇمىس كۇنىنە دەيىن توقتاتىلادى. ەگەر دە الەمدىك برەندتەردىڭ رەسمي وكىلدەرى تاۋارلاردىڭ قازاقستانعا اكەلىنۋىنە رۇقسات بەرىلگەندىگىن راستاماسا، وندا ۇستالعان تاۋارلار سوت شەشىمىمەن تاركىلەنەدى.

ودان باسقا، ق ر اكىمشىلىك قۇقىق بۇزۋشىلىق كودەكسىنىڭ 535-بابىنا سايكەس، زياتكەرلىك مەنشىك قۇقىعىن بۇزۋ دەرەگى بويىنشا اكىمشىلىك جاۋاپكەرشىلىك قاراستىرىلعان.

الماتى قالاسى بويىنشا مەملەكەتتىك كىرىستەر دەپارتامەنتى زياتكەرلىك مەنشىك قۇقىعىنىڭ ساقتالۋىن قامتاماسىز ەتۋ بويىنشا تۇراقتى نەگىزدە جۇمىستار اتقارىپ جاتىر. الماتىدا جىل باسىنان بەرى زياتكەرلىك مەنشىك قۇقىعىنىڭ بۇزىلعاندىعى جونىندە 8 دەرەك انىقتالدى. قۇقىق بۇزۋشىلىق ارەكەتكە بارعاندار اكىمشىلىك جاۋاپكەرشىلىككە تارتىلدى.

اۆتور: ايبوتا جاپپاربەرگەن