رەسەي «بايقوڭىردىڭ» ءالى كوپ ۋاقىت بويى وزدەرىنە قاجەت بولاتىنىن ەسكەرتتى

استانا. قازاقپارات - رەسەي پرەزيدەنتى اكىمشىلىگىنىڭ باسشىسى سەرگەي يۆانوۆ «ۆوستوچنىي» عارىش ايلاعى ىسكە قوسىلسا دا، «بايقوڭىردىڭ» رەسەيگە ءالى كوپ ۋاقىت بويى قاجەت بولاتىنىن مالىمدەدى.

بۇل تۋرالى ر ي ا نوۆوستيگە سىلتەمە جاساپ «قامشى» پورتالى حابارلايدى.

وعان «رەسەيدە جاڭا عارىش ايلاعى پايدا بولعاندىقتان، رەسەيگە «بايقوڭىردىڭ» قاجەتتىلىگى بولا ما؟» دەگەن سۇراق قويىلعان ەدى.

«جوق، «بايقوڭىر» بىزگە ءالى كوپ ۋاقىتقا قاجەت بولادى، ءبىز بۇل تۋرالى كوپ ايتقانبىز»، - دەپ جاۋاپ قاتتى يۆانوۆ.

سونىمەن قاتار، يۆانوۆ پيلوتتىق كوسموناۆتيكانىڭ بار ەكەندىگىن ايتتى جانە «بايقوڭىردان» «پروتوننىڭ» ۇشىرىلۋى جالعاساتىنىن اتاپ ءوتتى.

بۇعان رەسەيدىڭ «بايقوڭىرعا» بالاما رەتىندە سالعان «ۆوستوچنىي» عارىش ايلاعى بۇگىن ىسكە قوسىلىپ، العاش رەت عارىشقا زىمىران ۇشىردى دەپ حابارلادى Skifnews.kz باسىلىمى.

«ميحايلو لومونوسوۆ»، «ايست-2د» جانە SamSat-218د سپۋتنيكتەرىن «سويۋز-2.1ا» زىمىران تاسىعىشى استانا ۋاقىتىمەن ساعات 08:01 دە اۋەگە كوتەرىلدى.

جەر سەرىكتەرى زىمىراننىڭ نەگىزگى بولىگىنەن ءۇش ساعاتتىڭ ىشىندە اجىراپ بىتەدى. ال، نەگىزگى ميسسياسى اياقتالعان زىمىراننىڭ ءبىر بولىگى امۋر وبلىسىنا، ەكىنشى بولىگى ياكۋتيا جەرىنە قۇلايدى دەپ كۇتىلۋدە. سوڭعى ءۇشىنشى بولىگى بولسا مۇحيتتىڭ كەمەلەر جۇزبەيتىن بولىگىنە تۇسەدى.

ايتا كەتەيىك، «ۆوستوچنىي» عارىش ايلاعىنداعى زىمىران ۇشىرۋ كەشە جۇزەگە اسۋى ءتيىس بولاتىن. الايدا، 1,5 مينۋت قالعان ساتتە تەحنيكالىق اقاۋ شىعىپ، ۇشىرۋ 1 تاۋلىككە كەيىن قالدىرىلعان. الايدا، رەسەي پرەزيدەنتى ۆلاديمير پۋتين «ۆوستوچنىي» عارىش ايلاعىنداعى ءبىرىنشى ۇشىرىلىمدى كەيىنگە قالدىرۋدىڭ سەبەبى زىمىران-تاسىعىشتاعى كىناراتتان ەمەس، عارىش ايلاعىنىڭ وزىندە پروبلەما بار دەيدى. پۋتين بۇدان ناتيجە شىعارۋىن بۇيىردى.

ۆوستوچنىي عارىش ايلاعىنىڭ قۇرىلىسىنا 400 ميلليارد رۋبل بولىنگەن. مۇنى رەسەيدەگى سوڭعى جىلدارداعى ەڭ كوررۋپتسيالىق جوبا دەپ اتايدى. ونىڭ قۇرىلىسى 2012-جىلى باستالعان، 2015-جىلى اياقتالۋى ءتيىس بولعان. ءبىراق جەمقورلىق كەدەرگى كەلتىرگەن. باس پروكۋراتۋرانىڭ مالىمدەۋىنشە، قۇرىلىس كەزىندە 7,5 ميلليارد رۋبل ۇرلانعان.