قازاقستاندا ءۇش تىلدىلىك ءبىلىم بەرۋدى ەنگىزۋدىڭ ءمانى حالىقتىڭ قازاق ءتىلىن جاپپاي مەڭگەرۋىنە نەگىزدەلىپ وتىر - ە. ساعاديەۆ

استانا. قازاقپارات - ق ر ءبىلىم جانە عىلىم ءمينيسترى ەرلان ساعاديەۆ ءۇش ءتىلدى ءبىلىم بەرۋدىڭ باستى ماڭىزى قازاقستان حالقىنا قازاق ءتىلىن جاپپاي يگەرۋگە نەگىزدەلگەنىن مالىمدەدى.

«نە ءۇشىن ءۇش تىلدىكتى دامىتۋ كەرەك؟ بۇگىندە ءبىلىمنىڭ، عىلىمنىڭ، اقپاراتتىڭ بولاشاعى، سونداي- اق ۇلتتىق قابىلەتتىلىگى اعىلشىن ءتىلىن بىلۋگە بايلانىستى ەكەنىنە كۇمان جوق. ءتىلدى مەڭگەرۋدى مەكتەپتەن باستاۋ كەرەك. وسى رەتتە بىرتىندەپ ءبىلىم دەڭگەيىن جوعارىلاتىپ، جوعارى سىنىپتاردا پاندىك وقۋعا كوشۋ كەرەك. دەگەنمەن دە قازاقستاندا ءۇش تىلدىلىك ءبىلىم بەرۋدى ەنگىزۋ ءمان- جايىنىڭ ەڭ ماڭىزىن ءتۇسىنۋ كەرەك، ياعني بۇل قادام تۇرعىنداردىڭ قازاق ءتىلىن جاپپاي مەڭگەرۋىنە باسىمدىق بەرەدى. قازاق ءتىلىن مەڭگەرۋدىڭ باسىمدىعى بولعان جانە بولا بەرەدى»، - دەپ توقتالدى مينيستر.

سوندىقتان ە. ساعاديەۆ بارشا مەكتەپتەردە قازاق ءتىلى مەن ادەبيەتىنەن بولەك، جوعارى سىنىپتاردا مىندەتتى تۇردە قازاقستان تاريحى مەملەكەتتىك تىلدە جۇرگىزىلەتىنىن اتاپ ءوتتى.

سونىمەن قاتار مينيستر قازاق ءتىلىن وقىتۋ ادىستەمەسىندە كەمشىلىك بار ەكەنىن ايتا كەلە، بۇل باعىتتا جۇمىستار جۇزەگە اسىرىلاتىنىن جەتكىزدى.

مۇنىمەن قوسا ۆەدومستۆو باسشىسى بيىلعى 1 - قىركۇيەكتەن باستاپ ەشكىم دە پاندىك ءۇش تىلدىلىكتى ەنگىزبەيتىنىن اتاپ ءوتتى. تىلدەردى بالالار وقيدى، الايدا پاندەر ءوز تىلدەرىندە جۇرگىزىلەدى. باعدارلاماعا سايكەس، تەك 10 مەن 11-سىنىپتاردا جانە 2019 - جىلدان باستاپ، ياعني تەك ءۇش جىلدان كەيىن تەك ءتورت ءپان اعىلشىن تىلىندە جۇرگىزىلەدى. اتاپ ايتقاندا، حيميا، فيزيكا، بيولوگيا، ينفورماتيكا اعىلشىن تىلىندە وقىتىلادى، بۇل تۇرعىدا اپتاسىنا 8 ساعات قامتىلادى.

اۆتور: رۋسلان عابباسوۆ