شىعىس قازاقستان وبلىسىندا مال ۇرلاپ جۇرگەن قار ادامى ىزدەستىرىلۋدە

استانا. قازاقپارات - شىعىس قازاقستان وبلىسىندا قار ادامى پايدا بولدى. بەلگىسىز تىرشىلىك يەسى بىرنەشە جەرگىلىكتى تۇرعىننىڭ كوزىنە شالىنعان،

 دەپ جازادى 24.kz.

شارۋالاردىڭ ايتۋىنشا، «تاعى ادام» ولاردىڭ مالدارىن ۇرلايدى ەكەن. التاي تاۋىن قار ادامى مەكەندەيتىنى تۋرالى بۇرىننان ايتىلىپ ءجۇر. الايدا بۇگىنگى كۇنگە دەيىن بۇل تەك الىپقاشپا ءسوز بولىپ كەلگەن. ەندى قار ادامىن كورگەن كۋاگەرلەر بار.

جەرگىلىكتى تۇرعىننىڭ ءبىرى جابايى تىرشىلىك يەسىن كەشە كەشكىسىن قوراداعى مالدارىن تۇگەندەپ جۇرگەندە كەزدەستىرگەن. ول تۇسىنىكسىز ءبىر دىبىستى ەستىپ، سول داۋىس شىققان جاققا بارعاندا، قورانىڭ ەكىنشى بۇرىشىنان ءۇستى- باسىن قالىڭ تۇك باسقان ءىرى ادام قويلاردىڭ ءبىرىن ءىلىپ الىپ، قورشاۋدان سەكىرىپ ءوتىپ، تاۋعا قاراي ءىز سۋىتقان.

كۋاگەردىڭ ايتۋىنشا، شاقىرىلماعان قوناقتىڭ بويى 2 مەتردەن اسادى. قولدارى ەرەكشە ۇزىن، ءجۇرىسى مايمىلعا ۇقسايدى. ال تاڭەرتەڭ قورا ماڭىنان ادامنىڭ ىزدەرى مەن قاندى كورەدى. ءىز ادام ىزىنە ۇقساس بولعانىمەن، كولەمى ۇلكەن. قازىر ارنايى توپ جاساقتالىپ، قار ادامىن ىزدەۋ ءۇشىن تاۋعا اتتانعان. جەرگىلىكتى تۇرعىنداردىڭ ايتۋىنشا، مالدارى ءجيى جوعالادى. الايدا ولار بۇعان دەيىن كىنانى ۇرىلارعا اۋدارىپ كەلگەن. ەندى اۋىل تۇرعىندارى بەلگىسىز تىرشىلىك يەسىن قولعا ءتۇسىرۋدى ويلاپ وتىر. سەبەبى قويلارىنىڭ ۇرلانعانىنا ەمەس، بالالارى ءۇشىن قاۋىپتەنەدى. ويتكەنى ءىرى ءارى كۇشتى جاراتىلىس يەسىنەن بالا تۇرماق ۇلكەن ادامنىڭ ءوزى قاشىپ قۇتىلا المايدى.