ءا. جاقسىبەكوۆ جەكە جانە مەملەكەتتىك بالاباقشا تولەمدەرىن تەڭەستىرۋدى ۇسىندى

 استانا. قازاقپارات - بيىلدان باستاپ جاڭا سالىناتىن ۇيلەردە شاعىن بالاباقشالار بولۋى ءتيىس. بۇل تۋرالى استانا قالاسىنىڭ الەۋمەتتىك- ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە ق ر پرەزيدەنتى نۇرسۇلتان نازاربايەۆ ايتتى.

 «استانا جاس قالا. ورتاشا جاس 35-تەن اسپايدى. سوندىقتان جاس وتباسىلار ءۇشىن بالاباقشامەن قامتاماسىز ەتۋ پروبلەما بولىپ وتىر. سوندىقتان بۇل ماسەلەنى ايتىپ كەتكەندىكتەن توقتالماي- اق قويايىن. بارلىق قۇرىلىسشىلارعا قاجەتتى جەردە بالاباقشالاردىڭ بولۋىن مىندەتتەڭىزدەر. بۇل بالاباقشالاردى بولەك سالۋدىڭ قاجەتى جوق. بۇگىنگى كۇنى جىل سايىن 100 تۇرعىن ءۇي سالىنعانىمەن نەبارى 25 شاعىن ورتالىق قۇرىلىپتى. سوندا قاراستىرىلماعان دا عوي»، - دەدى ەلباسى.

وسى رەتتە مەملەكەت باسشىسىنا جاۋاپ بەرگەن ەلوردانىڭ قۇرىلىسىنا جاۋاپتى قىزمەتكەرى سالىنىپ جاتقان تۇرعىن ۇيدە بالاباقشا بولۋى ءتيىس دەگەن نورماتيۆتىڭ جوقتىعىن العا تارتتى.

 «ۇسىنىس ەنگىزىڭىزدەر. كارىم قاجىمحان ۇلى (ق ر پرەمەر- ءمينيسترى) نورماتيۆتى وزگەرتىڭىزدەر. سايكەسىنشە شەشىم قابىلدايتىن بولامىز. زاڭعا وزگەرتۋلەر ەنگىزۋ قاجەت بولسا، ەنگىزەمىز. وسى جىلى سالىناتىن ۇيلەردە ونداي بولۋى كەرەكتىگىن بىردەن كورسەتۋ قاجەت»، - دەدى ن. نازاربايەۆ.

وسى رەتتە قالا باسشىسى ادىلبەك جاقسىبەكوۆ مەملەكەتتىك جانە جەكە مەنشىك بالاباقشالاردا تولەمدى تەڭەستىرۋ قاجەتتىگىن ايتتى. «ويتكەنى، قازىر مەملەكەتتىككە (بالاباقشاعا) تومەن تولەم جاسالعاندىقتان ادامدار جەكەمەنشىك بالاباقشالارعا بارماي، كەزەككە تۇرادى»، - دەدى قالا باسشىسى.

ءوز كەزەگىندە ءبىلىم جانە عىلىم ءمينيسترى ەرلان ساعاديەۆ كەلەسى جىلدان باستاپ «بالاپان» باعدارلاماسى بويىنشا جان باسىنا قارجىلاندىرۋ كولەمى ارتاتىندىعىن ايتتى. «سول كەزدە جەكەمەنشىك جانە مەملەكەتتىك بالاباقشالار اراسىنداعى تولەم تەڭەسەتىن بولادى»، - دەدى مينيستر.

اۆتور: مارلان جيەمباي