اۆستريا يتاليامەن شەكاراداعى باقىلاۋدى كۇشەيتپەك
بۇل تۋرالى تيرول پروۆينسياسىنىڭ باسشىسى حەلمۋت توماك مالىمدەدى، دەپ جازادى «bbc» اگەنتتىگى.
400 مەترلىك دۋال اۆستريانىڭ تيرول ايماعىن يتاليالىق وڭتۇستىك تيرول پروۆينسياسىنان ءبولىپ وتىرعان ءالپى تاۋلارىنداعى برەننەر اسۋىندا سالىنۋى مۇمكىن.
توماكتىڭ ايتۋىنشا، دۋالدىڭ سالىنۋ- سالىنباۋى يتاليانىڭ اۆستريامەن اراسىنداعى كەلىسىمگە بايلانىستى بولىپ وتىر. بيىك قابىرعا ەلگە كەلەتىن ميگرانتتار اعىنىن ۇستاپ تۇرۋعا كومەكتەسۋى ءتيىس. بۇل - اۆستريانىڭ ەلدە شەكارالىق باقىلاۋدى ەنگىزۋگە جاساعان قادامى. سونىمەن قاتار، اۆستريا شەكارادان وتەتىن جەكە كولىكتەردى، جۇك كولىكتەرى مەن پويىزداردى تەكسەرۋدى قولعا الماق.
يتاليا ساياساتكەرى ماتتەو رەنسي برەننەردى جابۋ ەۋروپالىق وداقتىڭ ىشكى ەرەجەلەرىن بۇزۋ دەپ مالىمدەدى. ونىڭ ايتۋىنشا، بۇل شەشىم بىرىككەن ەۋروپانىڭ بولاشاعىنا قاۋىپ توندىرەدى.
يتاليا ءۇشىن شەكارالىق باقىلاۋدىڭ ەنگىزىلۋى كۇردەلى سوققى بولماق، سەبەبى بۇل - الپىدە كولىكتەر ەڭ كوپ جۇرەتىن جول. يتاليا ول ارقىلى ءوزىنىڭ نەگىزگى ساۋدا سەرىكتەسى گەرمانيامەن قاتىناسىپ وتىر.
