قۇرىلىس زاڭىن بۇزسا پروكۋراتۋرا ورگاندارىنا جۇگىنۋ كەرەك - ن. نازاربايەۆ
بۇل تۋرالى بۇگىن استانا قالاسىنىڭ الەۋمەتتىك-ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە ق ر پرەزيدەنتى نۇرسۇلتان نازاربايەۆ ايتتى.
«مەن قالادا 1 ميلليون 750 مىڭ شارشى مەتر تۇرعىن ءۇيدىڭ پايدالانۋعا بەرىلگەنىن ايتتىم، بۇل رەكوردتىق كورسەتكىش. دەگەنمەن، ەكىنشى جاعىنان ءبىز 2008-2010-جىلدارى قوردالانعان ۇلەسكەرلەردىڭ پروبلەماسىن شەشۋ ءۇشىن ۇلتتىق قوردان مول قارجىنى شىعىندادىق. الايدا، قالادا تاعى دا 8 مىڭعا جۋىق ۇلەسكەردىڭ قاتىسۋىمەن 45 پروبلەمالى نىسان پايدا بولدى. ولار قايدان شىعىپ وتىر؟»، - دەدى ەلباسى.
سونىمەن قاتار مەملەكەت باسشىسى ەلوردادا ءوز بەتىمەن سالىنىپ جاتقان 37 تۇرعىن ءۇيدىڭ انىقتالعانىن، ونىڭ 31 ءىنىڭ قۇرىلىسى توقتاتىلعانىمەن قالعانىنىڭ قۇرىلىسى جۇرگىزىلىپ جاتقانىن اتاپ ءوتتى.
«تارتىپكە كەلتىرىڭىزدەر. ەگەر زاڭدى بۇزسا، پروكۋراتۋرا ورگاندارىنا جۇگىنىڭىزدەر. زاڭنامالىق جولمەن قۇرىلىسقا شەكتەۋ قويۋ تۋرالى شەشىم قابىلداسىن»، - دەدى ن. نازاربايەۆ.
اۆتور: مارلان جيەمباي
