مەملەكەت باسشىسى جاڭادان پايدالانۋعا بەرىلگەن ۇيلەردىڭ تومەنگى قاباتىندا بالاباقشالار اشۋدى تاپسىردى

استانا. قازاقپارات - ق ر پرەزيدەنتى نۇرسۇلتان نازاربايەۆ جاڭادان پايدالانۋعا بەرىلىپ جاتقان ۇيلەردىڭ ءبىرىنشى قاباتتارىنان بالاباقشالار اشۋدى تاپسىردى.

«الداعى جىلدارى ەلوردانىڭ ارحيتەكتۋرالىق كەلبەتى جاڭارادى جانە جاڭا ەلەۋلى عيماراتتارمەن تولىعا تۇسەدى. اۋەجايدىڭ جاڭعىرتىلۋى، تەمىرجول ۆوكزالى، حورەوگرافيا اكادەمياسى، ءابۋ-دابي پلازا، جاسىل اۋدان تۇرعىن ءۇي الابى، ريتس كارلتون قوناق ءۇيى جانە وزگە دە نىساندار سالىنادى. سونىمەن قاتار ەكسپو-2017 كورمەسىنە وراي، 24 قوناق ءۇي كەشەنى جانە 15 مىڭ ورىنعا ەكسپو قالاشىق سالىنادى»، - دەپ حابارلادى استانا اكىمى ادىلبەك جاقسىبەكوۆ ەلوردانىڭ دامۋىنا قاتىستى وتكەن جيىندا.

ءوز كەزەگىندە، جيىنعا ءتوراعالىق ەتكەن مەملەكەت باسشىسى قۇرىلىس بارىسىندا بالاباقشالاردىڭ سالىنۋىن كوزدەن تاسا قىلماۋدى تاپسىردى. سەبەبى استانا بالاباقشامەن قامتۋ دەڭگەيى بويىنشا سوڭعى ورىنداردا تۇر.

«قىرۋار تۇرعىن ۇيلەر پايدالانۋعا بەرىلىپ جاتىر. بۇل ۇيلەردىڭ تومەنگى قاباتتارىندا بالاباقشا بار ما؟ مۇندا بارلىق قۇرىلىس كومپانيالارىنىڭ باسشىلارى وتىر، ءبىز ولارعا قاراجات بەرەمىز، نەسيە بەرەمىز. ءبىز ول تۇرعىن ۇيلەردىڭ ىشىندە بالاباقشا بولۋىن قاراستىرىپ، تالاپ قويۋىمىز كەرەك. ءزاۋلىم عيماراتتار سالىپ كەرەك ەمەس. ءۇي قۇرىلىسىنا رۇقسات بەرەر كەزدە، ولاردىڭ ءبىرىنشى قاباتتارىندا بالاباقشا سالىنۋى ءتيىس دەگەن تالاپ قويىڭىزدار. بارلىق الەمدە سولاي»، - دەدى ن. نازاربايەۆ.

اۆتور: جاسۇلان جولدىبايەۆ