ەلباسى استاناداعى جول ساپاسىنا قاتىستى اكىمدىك باسشىلارىن قاتتى سىنادى

استانا. قازاقپارات - ق ر پرەزيدەنتى نۇرسۇلتان نازاربايەۆ بۇگىن استانانىڭ دامۋىنا قاتىستى جيىندا قالادا سۋ ارىقتارىن سالۋدى بۇيىردى.

استانادا جولداردىڭ 27 پايىزى، ياعني 4/1 ىندە اسفالت جوق. وسىعان جىل سايىن بيۋدجەتتەن 50 ميلليارد تەڭگە بولىنەدى. جاقىندا عانا سالىنعان جولدار، قازىر شۇرىق-تەسىك، ساپاسى سىن كوتەرمەيدى. بۇل جول قۇرىلىسى كەزىندە باقىلاۋ جۇيەسىنىڭ جوقتىعىنان.

ءوز كەزەگىندە، استانا اكىمىنىڭ ورىنباسارى قوسمان ايتمۇحامەتوۆ ەلوردادا 1- ماۋسىمعا دەيىن بۇلىنگەن جولداردى جونگە كەلتىرىلەتىندىگىن ۋادە ەتتى. «قازىرگى ۋاقىتتا 93 ۋچاسكەدە جۇمىستى باستاپ كەتتىك. بيىل 24 شاقىرىم جول جوندەلەدى»، - دەدى ول.

«قالادا سالىنعان جول ساپاسىن تەكسەرەتىن ارنايى زەرتحانا جوق. سودان جىل سايىن جولدارىڭ ءبۇلىنىپ جاتىر. نەگە زەرتحانا جوق؟ باستى سەبەپتەردىڭ ءبىرى - قالادا سۋ ارىقتارى جوق. مىنا سۋرەتتى قاراڭىز، مىناۋ قاي قالادا، استانادا ما، الدە وزگە جەردە مە؟»، - دەپ توتەسىنەن قويدى ن. نازاربايەۆ ەلوردادا بىلتىر سۋ باسقان كوشەلەردى نۇسقاپ.

ال ەلوردا اكىمىنىڭ ورىنباسارى بۇل جايتتىڭ استانادا ورىن الماعانىن، كوشەلەردى سۋ باسقان سۋرەتتىڭ وزگە قالادا بولعانىن ايتىپ اقتالدى.

«كەلەسى سۋرەتتى كورسەتىڭدەر، مىنە، مىناۋ تايلاند پا؟! استانا ما، پاريج با؟! كەلەسى سلايد، بولمادى ما بىزدە؟ جاڭبىرلى كۇندەرى سەن قالادا دا جۇرمەيدى ەكەنسىڭ عوي. اقبۇلاق كوشەسى تۇگىلى، اقوردانىڭ الدىنداعى ورىنبور كوشەسىندە دە كولىكتەر قالقىپ ءجۇردى سۋدا. رەسپۋبليكانىڭ اقشاسىنا 130 تەحنيكا ساتىپ الىنىپ، سۋدى سورادى. وسى قاراجاتتى سۋ ارىقتارىنا، كارىز جۇيەلەرىنە جۇمساۋ كەرەك ەدى؟»، - دەپ شۇيلىكتى پرەزيدەنت. - بۇل كۇلكىلى جاعداي ەمەس، استانا ۆەنەتسيا ەمەس قوي. سۋ سوراتىن كولىكتەر ماسەلەنى شەشە مە؟!».

دەگەنمەن ق. ايتمۇحامەت تاسقىن سۋ ماسەلەسى بيىل استانانىڭ سول جاعالاۋىندا تولىق شەشىلەتىندىگىن حابارلادى. ال قالا بويىنشا الداعى ءۇش جىلدا سۋ ارىقتارى ماسەلەسى تۇبەگەيلى شەشىمىن تابادى.

اۆتور: جاسۇلان جولدىبايەۆ