فۋتبولشىلارعا ويناۋ باقىتى بۇيىرماعان ستاديون - فوتو

پريپياتتاعى چەرنوبىل اتوم ەلەكتر ستانتسياسىنىڭ جارىلۋى تۇرعىندارعا زالالىن تيگىزىپ قانا قويماي، جەرگىلىكتى فۋتبولدىڭ شىراعىن ءسوندىردى...
پريپيات (ۋكراينا) قالاسىنىڭ نەگىزى 1970-جىلى قالانعان. قالادا سپورت ۇيىرمەلەرى كوپتەپ اشىلعانمەن، فۋتبول كومانداسى بىردەن قۇرىلا قويعان جوق. ونىڭ ۇستىنە ارنايى ستاديون دا بولمادى. 70-جىلداردىڭ ورتاسىنا قاراي بارىپ، قالادا «سترويتەل» فۋتبول كلۋبى قۇرىلدى. كوماندا كيەۆ اۋدانىنىڭ اۋەسقوي ليگاسىندا ونەر كورسەتتى.
«سترويتەل» 1981-جىلدان باستاپ اۋەسقوي ليگادا ۋكراينانىڭ دەنە شىنىقتىرۋ ۇيىمىنىڭ ارنايى ليگاسىندا ويناي باستادى. 1985-جىلى كوماندا ەڭ ءىرى جەتىستىگىنە قول جەتكىزدى. ءبىراق، توپتا ەكىنشى ورىن الىپ قالىپ، ك س ر و ەكىنشى ليگاسىنا وتە الماي قالدى. وتكەندە كاسىبي كلۋب دەڭگەيىنە كوتەرىلەتىن ەدى.
كوماندا ويىندارىن كىشىگىرىم ستاديونداردا وتكىزىپ كەلدى. كەيىننەن كوماندانىڭ جەتىستىگى ەسكەرىلىپ، جاڭا ستاديون سالىنا باستادى. ال ول ستاديوننىڭ («اۆانگارد») اشىلۋ سالتاناتى 1986-جىلدىڭ 1- مامىرىنا جوسپارلاندى. الايدا 5000 ادامعا ارنالعان الاڭدا ويناۋ باقىتى «سترويتەل» فۋتبولشىلارىنا بۇيىرمادى. اتوم ەلەكتر ستانتسيا جارىلعانىنا 36 ساعات وتكەننەن كەيىن قالا حالقى جاپپاي كوشىرىلە باستادى. ال «سترويتەل» فۋتبول كلۋبى اراعا 2 جىل سالىپ، ءبىرجولا تاراپ كەتتى.
بۇگىندە ستاديوندى ءشوپ باسىپ، اعاشتار ءوسىپ كەتكەن.
massaget.kz