مەملەكەت باسشىسى استاناداعى جاعىمسىز ءيىستى بيىلدان قالدىرماي جويۋدى تاپسىردى
بۇل تۋرالى ول بۇگىن استانانىڭ دامۋىنا قاتىستى جيىندا ءمالىم ەتتى.
ايتا كەتەيىك، استانا ماڭىنداعى ساسىق ءيىستىڭ وشاعى بولىپ تابىلاتىن تالدىكول ماسەلەسى ون جىلدان بەرى شەشىلمەي كەلەدى.
«التى جىل تاسماعامبەتوۆ (يمانعالي تاسماعامبەتوۆ - استانا قالاسىنىڭ بۇرىنعى اكىمى) اينالىستى، ەشتەڭە ىستەمەدى، سەن كەلدىڭ، ەشتەڭە بىتىرمەدىڭ. استانادا ساسىق ءيىس بار ءالى. ەگەر بيىل شەشپەسەڭدەر، حوروشۋن ەكەۋىڭە تالدىكول جاعاسىنا كيىز ءۇي تىككىزەمىن، سوندا تۇراسىڭدار.
6 ميلليارد تەڭگە جۇمسالدى، تۇك بىتپەدى. استاناعا كىم كەلەدى، مىناداي جاعىمسىز ءيىسى مۇڭكىپ تۇرسا. تالدىكول ماسەلەسىمەن قانشا جىل بولدى مەنى تويعىزعاندارىڭا. ۇكىمەتپەن، كىمنىڭ كومەگى كەرەك، شەشىڭدەر بۇل ماسەلەنى. ماسقارا عوي. استانامىز مىناداي دەپ ماقتانامىز»، - دەپ اتاپ ءوتتى پرەزيدەنت استانا اكىمى ادىلبەك جاقسىبەكوۆكە قاراتىپ ايتقان سوزىندە.
ءوز كەزەگىندە اكىم، سۋ سورعىش- تازارتۋ ستانساسىنىڭ قۇرىلىسى جوسپار بويىنشا ءجۇرىپ جاتقاندىعىن حابارلادى. ءا. جاقسىبەكوۆ 2017-جىلعا دەيىن اتالمىش ماسەلەنى شەشۋگە ۋادە ەتتى.
اۆتور: جاسۇلان جولدىبايەۆ
