قازاقى تازى مەن توبەت - ۇلتتىق ماقتانىشىمىز - و. ابدىكارىموۆ
بۇل تۋرالى بۇگىن الماتىدا ەل تاۋەلسىزدىگىنىڭ 25 جىلدىعىنا ارنالعان «قازاقى تازى مەن توبەتتى ساقتاپ، دامىتۋ» تاقىرىبىندا ءوتىپ جاتقان حالىقارالىق كونفەرەنتسيا بارىسىندا رەسپۋبليكالىق «قانسونار» قاۋىمداستىعىنىڭ باسقارما ءتوراعاسى ورالباي ابدىكارىموۆ ءمالىم ەتتى.
ونىڭ ايتۋىنشا، وكىنىشكە قاراي كەزىندە تازىلار مەن توبەتتەردىڭ تاعدىرى «مادەني مۇرا» باعدارلاماسىنان تىس قالدى.
«ءبىراق، ەشتەن كەش جاقسى دەمەي مە!؟ 2012-جىلى رەسپۋبليكالىق دارەجەدە ءبىزدىڭ قاۋىمداستىق قۇرىلدى. سودان بەرى كوپتەگەن جۇمىستار اتقارىلدى. 2014-جىلى ق ر اۋىل شارۋاشىلىعى ءمينيسترىنىڭ بۇيرىعىمەن تازى مەن توبەتتىڭ ستاندارتىن بەكىتۋ تۋرالى باستاما قۇپتالدى. «قازاق تازىسى» جانە «قازاقى توبەت» رەسپۋبليكالىق باعدارلامالارى جاسالدى. ماقساتىمىز - ەڭ الدىمەن تازى مەن توبەتتىڭ سانىن كوبەيتىپ الۋ. سونداي-اق، تىركەلگەن تازى مەن توبەتتەردىڭ رەسپۋبليكالىق بازاسىن جاساۋ، دالالىق سىناقتار، اڭشىلىقتار ۇيىمداستىرۋ، حالىقارالىق كورمەلەر مەن جارىستارعا قاتىسۋ. سوندىقتان، ازىرگە حالىقارالىق كينولوگيالىق ۇيىمداردى قالايدا مويىنداتۋعا ۇمتىلىپ جاتقان جوقپىز. دەگەنمەن، الەمنىڭ 85 ەلىندەگى كينولوگيالىق ۇيىمدارعا حات جازىپ، تازى مەن توبەت تۋرالى مالىمەت جانە ستاندارتتاردى جىبەرىپ قويدىق»، - دەدى و. ابدىكارىموۆ.
سونىمەن قاتار، ول توبەتتەردى يتتەردىڭ توبەلەسىنە قاتىستىرۋعا ءۇزىلدى-كەسىلدى قارسى ەكەندىگىن جەتكىزدى.
«وسى تازى مەن توبەت ءوسىرىپ وتىرعاندار ءبىزدى سولاردىڭ «نانىن تارتىپ الاتىنداي» كورەدى. ولاي ەمەس. ءبىز بۇل جۇمىسپەن پايدا تابۋ ءۇشىن اتقارىپ جاتقان جوقپىز. ماقساتىمىز - تازى مەن توبەتتى كوبەيتۋ جۇيەسىن ازىرلەۋ جانە جۇرتشىلىق تاراپىنان ولارعا دەگەن سۇرانىستى ارتتىرۋ. ياعني، تازى مەن توبەتتى تۇرمىستىق ماقساتتا پايدالانۋ. ال توبەتتەردى توبەلەستىرۋ - ادامگەرشىلىككە جاتپايدى. مۇنى كورگەن قازاقتىڭ بالاسى ەرتەڭ قانداي ادام بولىپ وسەدى؟ وسى جاعىن ويلايىق»، - دەدى و. ابدىكارىموۆ.
ايتا كەتەلىك، قازىرگى تاڭدا ەلىمىزدە تازا قاندى 300 گە تارتا تازى بار ەكەن. ال توبەتتەردىڭ ساناعى ءالى جۇرگىزىلىپ جاتىر.
اۆتور: ايبوتا جاپپاربەرگەن
