ن. نازاربايەۆتىڭ توراعالىعىمەن ەلوردانى دامىتۋ ماسەلەلەرىنە ارنالعان كەڭەس وتۋدە

استانا. قازاقپارات - بۇگىن ەلوردادا ق ر پرەزيدەنتى نۇرسۇلتان نازاربايەۆتىڭ توراعالىعىمەن استانا قالاسىنىڭ الەۋمەتتىك ەكونوميكالىق دامۋى مەن ەكسپو كورمەسى ماسەلەرىنە ارنالعان كەڭەس وتۋدە.

«ءبىزدىڭ باس قالامىز استانا كوز الدىمىزدا ەلىمىزبەن بىرگە ءوسىپ-وركەندەپ كەلە جاتىر. بۇگىندە بۇكىل جاھانعا ەلوردامىز بەلگىلى، كوپتەگەن بەدەلگە يە بولدى. حالىقارالىق ساراپشىلار استانانى بولاشاقتىڭ قالاسى دەپ ايتۋدا. ءبىز سوعان جاقىنداپ كەلە جاتىرمىز. ەڭسەلى ەلدوردامىزدى بارشا قازاقستاندىقتار سۇيەدى، ماقتانىش ەتەدى. ءبىزدىڭ ەلىمىزدىڭ جاڭا ساتىعا كوتەرىلۋىنىڭ بەلگىسى بولىپ وتىر. ءبىزدىڭ باس قالامىز بارلىق سالادا بۇكىل ەلىمىزدىڭ وڭىرلەرىنە ۇلگى بولۋى ءتيىس»، - دەدى كەڭەستى اشقان ەلباسى.

سونىمەن قاتار مەملەكەت باسشىسى كەلەسى جىلى استانادا بۇكىل الەمدىك حالىقارالىق ەكسپو كورمەسى وتەتىندىگىن، وعان بارلىق مەملەكەتتىك ورتالىق ورگاندار، ۇلتتىق كومپانيالار، دامۋ ينستيتۋتتارى اتسالىسىپ جاتقاندىعىن باسا ايتتى. «بۇكىل ەل بولىپ حالىقارالىق كورمەنى كۇش سالىپ، جوعارى دەڭگەيدە وتكىزۋىمىز قاجەت»، - دەدى ن. نازاربايەۆ.

ايتا كەتەيىك، استانا قالاسىنىڭ دامۋى بويىنشا ەلوردا اكىمى ادىلبەك جاقسىبەكوۆ بايانداما جاساۋدا. ال ەكسپو كورمەسى ماسەلەلەرىنە وراي «استانا ەكسپو-2017» ۇلتتىق كومپانياسىنىڭ باسشىسى احمەتجان ەسىموۆ، ەنەرگەتيكا ءمينيسترى قانات بوزىمبايەۆ، سىرتقى ىستەر ءمينيسترى ەرلان ىدىرىسوۆ بايانداما جاسايدى.

اۆتور: مارلان جيەمباي