تۇركيادا ءوتىپ جاتقان ەكسپو كورمەسىندە بۇكىل الەم قازاقستاننىڭ ەمدىك وسىمدىكتەرىن تانىپ جاتىر
«گۇلدەر مەن بالالار» تاقىرىبىن ارقاۋ ەتكەن ەكسپو انتاليا-2016 كورمەسىن وعان قاتىسىپ جاتقان قىرىقتان استام ەل مەن وتىز حالىقارالىق ۇيىم انتاليانىڭ جاڭا ورتالىق اۋماعىن ادەمى باۋ- باقشاعا اينالدىرىپ جىبەرگەن.
سالتاناتتى اشىلۋ راسىمىنە تۇركيا پرەزيدەنتى رەدجەپ تايىپ ەردوعان، پرەمەر- مينيستر احمەت داۆۋتوعلۋ، س ءى م باسشىسى ميەۆليۋت چاۆۋشوعلۋ، سونداي- اق الەمنىڭ 53 ەلىنىڭ وكىلدەرى قاتىستى.
ەكسپو انتاليا-2016 كورمەسىندەگى قازاقستان رەسپۋبليكاسىنىڭ پاۆيلونى 512 شارشى مەتر اۋماقتى الىپ جاتىر. ۇلتتىق پاۆيلونىمىز الىستان كوز تارتادى، سەبەبى كيىز ءۇي پىشىنىندە سالىنعان پاۆيلوننىڭ ءبىر جاعى - كورمەنىڭ تاقىرىبىن اشىپ، قازاقستاننىڭ الۋان ءتۇرلى كليماتى مەن وسىمدىكتەرى تۋرالى اقپارات بەرسە، ەكىنشى جاعى سوناۋ كۇلتەگىن كەزەڭىنىڭ ەسكەرتكىشتەرىن، قازاق حالقىنىڭ ۇلتتىق اسپاپتارىن، ەلىمىزدىڭ دامۋ سيمۆولى - بارىستىڭ بەينەسىن، ءتىپتى، كەلەسى جىلى استانادا وتەتىن ەكسپو-2017 كورمەسىنىڭ تاقىرىبىن قامتىعان.
قازاق، ورىس، تۇرىك، اعىلشىن جانە تاعى بىرنەشە تىلدە پاۆيلونىمىز تۋرالى تولىق اقپارات بەرەتىن قىزمەتكەرلەردىڭ ءبىرى - ءسانيا ەسىمدى بويجەتكەن. قاراپ تۇرساق، ءتىپتى پاۆيلون قىزمەتكەرلەرىنە ارنالعان كيىمنىڭ ءوزى قازاق ۇلتىنىڭ قاستەرلى سالت- ءداستۇرى مەن قازىرگى قازاقستاننىڭ ەركىندىگىن، ادەمىلىگى مەن زاماناۋي قالپىن ۇيلەستىرە بىلگەن.
«پاۆيلونىمىزدا قازاقستاننىڭ الۋان ءتۇرلى كليماتى تۋرالى، قازاق جەرىندەگى وسىمدىكتەر مەن جانۋارلار الەمى تۋرالى اقپارات وتە كوپ. ياعني، ەنەدميك وسىمدىكتەرگە (جەرگىلىكتى جەردە وسەتىن وسىمدىكتەر) باسا نازار ءبولىپ وتىرمىز. اسىرەسە، قىزىل كىتاپقا ەنگەن مالتۋس وسىمدىكتەرىنىڭ ءتۇرىن بۇتاق كۇيىندە دە، ءتىرى ەكسپونات كۇيىندە دە كوپ اكەلدىك»، - دەيدى ق ر بوتانيكا جانە فيتورەپرودۋكسيا ينستيتۋتىنىڭ كىشى عىلىمي قىزمەتكەرى ءسانيا ينەربايەۆا
وسىمدىكتەر الەمىنەن تىس، «گۇلدەر مەن بالالار» تاقىرىبىن قامتۋ ءۇشىن پاۆيلونىمىزدىڭ «كەرەگەلەرىنە» قاستەيەۆ اتىنداعى بەينەلەۋ ونەرى مەن سۋرەت مەكتەبىنىڭ (الماتى قالاسى - اگەنتتىك) وقۋشىلارى سالعان ادەمى سۋرەتتەر ءىلىنىپ تۇر.
ال، بايتەرەكتىڭ بۇتاقتارىنا پاۆيلونىمىزعا كەلگەن ءارتۇرلى ۇلتتاردىڭ بالالارى قازاق بالالارىنا دەگەن تىلەكتەرىن جازىپ كەتىپ جاتىر.
ءسانيانىڭ ايتۋىنشا، كورمەنىڭ ءبىرىنشى كۇنىندە قازاقستاننىڭ پاۆيلونىنا كەلگەن تۋريستەر ساعات 11.00-16.00 ارالىعىندا ءبىر مينۋتقا دا ۇزىلمەگەن.
«كورمەنىڭ ءبىرىنشى كۇنىندە ساعات ون بىردەن كەشكى تورتكە دەيىن تىنباي جۇمىس ىستەدىك. ويتكەنى، تۋريستەر وتە كوپ كەلدى. جالپى، ءبىرىنشى كۇندى قورىتىندىلايتىن بولساق، تۋريستەردى ەكى ساناتقا بولۋگە بولادى. ءبىرىنشى توبى - تۇركياعا كەلىپ دەمالىپ جاتقان، جالپى، كورمەنىڭ كورنەكىلىگىمەن تانىسۋعا كەلگەن تۋريستەر. ەكىنشى توبى - بوتانيكا سالاسىنىڭ بىلگىر ماماندارى. مىسالى، مەكسيكا، كانادا، گرۋزيا مەن ازەربايجاننان كەلگەن دەلەگاتتار - تازا عىلىمي ورتانىڭ ماماندارى ەكەن. بۇنى ولاردىڭ سۇراقتارىنا قاراپ- اق بىلۋگە بولادى. جالپى، الەم بويىنشا كەلىپ جاتقان وسىنداي عالىم تۋريستەردىڭ ءبىر سۇراعى - قازاقستاندا وسەتىن ەمدىك وسىمدىكتەر»، - دەيدى ءسانيا. 
ءسانيانىڭ ايتۋىنشا، ءارتۇرلى ەلدەردىڭ عالىمدارى مەن عىلىمي ينستيتۋتتاردىڭ قىزمەتكەرلەرى قازاقستاننىڭ عىلىمي ينستيتۋتتارى تۋرالى اقپارات جيناپ، بايلانىس نومەرلەرىن جازىپ العان. «بولاشاقتا قازاق جەرىندەگى ەمدىك قاسيەتى مول وسىمدىكتەردى زەرتتەيتىنىنە بەك سەنىمدىمىن...»، - دەيدى ءسانيا.
P. S: قازاقستاندا وسەتىن التى مىڭنان استام وسىمدىك ءتۇرىنىڭ بەس جۇزدەي ءتۇرى دارىلىك وسىمدىكتەرگە جاتادى.
اۆتور: كەنجەكەي توقتامۇرات قىزى
