رەسەيمەن شەكاراداعى اينالىپ وتەتىن تەمىرجول قۇرىلىسىن سالۋ ەلىمىزگە قىمباتقا تۇسەدى - ءا. يسەكەشيەۆ
بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.
جالپى وتىرىستا قازاقستان مەن رەسەي اراسىنداعى تەمىر جول ۋچاسكەلەرى بويىنشا تاسىمالداۋ تولەمدەرىن راسىمدەۋ تارتىبىنە وزگەرىستەر ەنگىزۋ ماسەلەسى قارالعان ەدى.
زاڭ جوباسىن تالقىلاۋ بارىسىندا دەپۋتاتتار سولتۇستىك قازاقستان وبلىسىنداعى رەسەيمەن شەكارالاس وڭىرلەردە تەمىرجولمەن جۇك تاسىمالىنا قاتىستى قيىنشىلىقتاردى العا تارتىپ، ول بويىنشا قابىلداناتىن شارالار تۋرالى سۇراعان بولاتىن. ماسەلەن، قازاقستاندىق ازاماتتار رەسەيگە ەنەتىن تەمىرجول ۋچاسكەلەرىندە حالىقارالىق تاريف بويىنشا جۇك تولەمىن جاساپ كەلەدى. وسىعان بايلانىستى دەپۋتاتتار ەكى ەل اراسىنداعى تەمىرجول ۋچاسكەلەرى بويىنشا ترانزيتتىك الماسۋلار تۋرالى ماسەلە كوتەردى.
«بۇل پروبلەما تەمىرجول جۇيەلەرىنىڭ تەحنولوگيالىق سحەمالارىنا قاتىستى ورىن الىپ وتىر. ونداعى ءبىرىنشى ۋچاسكە ترانزيتتىك جولداردى قامتىمايدى. سول بويىنشا ءبىز الماسۋلار جاساپ 300 شاقىرىم تەمىر جولدى وزىمىزگە الدىق، رەسەي بىزدەگى 50 شاقىرىم تەمىرجولدى يەلەندى. ەندى قالعانى رەسەيدە پەتروپاۆل ستانساسى بولسا، ءبىز رەسەيدەگى لوكوت ستانسالارىن باسقارىپ كەلەمىز. ويتكەنى، بۇل ءبىز ءۇشىن اسا ماڭىزدى، تۇتاستاي باتىس قازاقستان مەن شىعىس قازاقستاندى بايلانىستىرىپ وتىرمىز. ال پەتروپاۆل تەمىرجول ۋچاسكەسى رەسەي ءۇشىن ماڭىزدى، ويتكەنى ول ترانس ءسىبىر جولىنىڭ تارماعىندا تۇر»، - دەدى ينۆەستيتسيالار جانە دامۋ ءمينيسترى اسەت يسەكەشيەۆ.
مينيستر بۇل رەتتە رەسەيمەن اراداعى تەمىرجولدار الماسۋ تەحنيكالىق جاعىنان مۇمكىن ەكەنىن، الايدا ەكونوميكالىق تۇرعىدان تاريفتەر بەلگىلەۋ بويىنشا ماسەلەنىڭ شەشىلۋى قاجەتتىگىن اتاپ ءوتتى. «رەسەي پەتروپاۆل ۋچاسكەسىنە قانداي تاريف بەلگىلەسە ءبىز دە لوكوت ۋچاسكەسىنە سونداي تاريف قويامىز. قازىرگى كۇنى ورالدى اينالىپ ءوتۋ پۋنكتتەرىن سالۋ وتە قىمبات ءارى 600 شاقىرىم بولىپ تابىلادى. ەگەر ءبىز رەسەيدەن پەتروپاۆلدى قايتاراتىن بولساق، ولاردىڭ باسقا دا جولدارى بار، وڭاي كەتە بەرەدى. سوندىقتان دا، ءبىز باتىس جانە شىعىس قازاقستان بويىنشا قيىندىقتار تۋدىرىپ الۋىمىز مۇمكىن. وسىعان بايلانىستى تەحنولوگيالىق جاعىنان ەشقانداي پروبلەمالار بولىپ وتىرعان جوق»، - دەدى مينيستر.
اۆتور: قانات مامەتقازى ۇلى
