ستەپنياك قالاسىندا ءبىرجان سال ەسكەرتكىشىن بۇلدىرگەندەرگە قارسى ءىس قوزعالعان جوق - اقمولا وبلىسى

كوكشەتاۋ. قازاقپارات - اقمولا وبلىسى ەڭبەكشىلدەر اۋدانىنىڭ ستەپنياك قالاسىندا ءبىرجان سال ەسكەرتكىشىنە شاشىلعان بەلگىسىز سۇيىقتىق زەرتحانادا زەرتتەلىپ جاتىر.

 بۇل تۋرالى وبلىستىق ءى ءى د باسپا ءسوز قىزمەتىنەن حابارلادى.

 ەسكە سالا كەتسەك، جۋىردا بۇقارالىق اقپارات قۇرالدارىندا ەڭبەكشىلدەر اۋدانىنىڭ ستەپنياك قالاسىندا حالقىمىزدىڭ ءبىر تۋار ۇلى، اسا دارىندى حالىق كومپوزيتورى ءبىرجان سال ەسكەرتكىشىنە بەلگىسىز بىرەۋلەردىڭ سىناپ شاشىپ كەتتى دەگەن اقپارات تاراعان بولاتىن.

وسىعان وراي، «قازاقپارات» ءتىلشىسى وبلىستىق توتەنشە جاعدايلار جونىندەگى دەپارتامەنتتىڭ ءبىرىڭعاي كەزەكشى ديسپەچەرلىك قىزمەتى باسقارماسىنىڭ باسشىسى ايۆار بۇلقايىروۆقا حابارلاستى. ونىڭ ايتۋىنشا، ەسكەرتكىشكە بەلگىسىز سۇيىقتىڭ شاشىلعانى راس. بۇل تۋرالى ءساۋىردىڭ 25- كۇنى ەڭبەكشىلدەر اۋداندىق ءى ءى ب قىزمەتكەرلەرى حابارلاعان.

 وبلىستىق تۇتىنۋشىلار قۇقىعىن قورعاۋ دەپارتامەنتىنىڭ زەرتحانا ماماندارىنىڭ الدىن الا مالىمەتى بويىنشا شاشىلعان زات سىناپ بولۋى مۇمكىن.

 ال، وبلىستىق ءى ءى د باسپا ءسوز قىزمەتىنىڭ مالىمەتى بويىنشا ەسكەرتكىشكە شاشىلعان زات انىقتالماعاندىقتان، ازىرگە ەشقانداي قىلمىستىق ءىس قوزعالماي وتىر.

«زەرتحانادا ساراپتاما جۇمىستارى تولىق اياقتالىپ، مامانداردىڭ قورىتىندىسى شىعارىلعان سوڭ عانا قانداي دا ءبىر شارا قولداناتىن بولامىز»، - دەدى ءى ءى د باسپا ءسوز قىزمەتىنەن.

اۆتور: اسلان وسپانوۆ