ماڭگىلىك ەل پاتريوتتىق اكتىسىنىڭ تولىق ءماتىنى
«قازاقپارات» ح ا ا اكتىنىڭ تولىق ءماتىنىن جاريالايدى.
«حالىق ءومىرى ونىڭ كەلەسى ۇرپاعىمەن جالعاسىپ وتىرادى. سوندىقتان حالىقتىڭ ماڭگىلىگى تۋرالى ارماننان اسقاق ارمان جوق. ماڭگىلىك ەل - بۇل ەرتەڭگى كۇنگە ەسىك اشاتىن، بولاشاققا سەنىمدى ارتتىراتىن يدەيا، بۇل - كەرى قايتپايتىن جانە بەرىك تۇراقتىلىقتىڭ سيمۆولى...»
ن. ءا. نازاربايەۆتىڭ قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا سويلەگەن سوزىنەن
2014 -جىلعى 15 -جەلتوقسان
ءبىز، بايىرعى قازاق جەرىندە ءبىر تاعدىر جانە تاريحي جاد ارقىلى بايلانىسقان، ۇلى دالا ەلىنىڭ داڭقتى تاريحى مەن داستۇرلەرىن جالعاستىرعان قازاقستان ازاماتتارى، كوپتەگەن ۇرپاقتىڭ تاۋەلسىزدىك تۋرالى ارمانىن ىسكە اسىرىپ، بولاشاق ۇرپاق الدىنداعى قاسيەتتى پارىزىمىزدى، بەيبىتشىلىك پەن كەلىسىمنىڭ، بىرلىك پەن تۇتاستىقتىڭ ماڭىزدىلىعىن سەزىنىپ، قوعام مەن مەملەكەتتىڭ جوعارى مۇددەلەرىن نەگىزگە الا وتىرىپ، تاۋەلسىزدىكتىڭ 25 جىلدىق مەرەيلى جىلىندا وسى
ماڭگىلىك ەل - پاتريوتتىق اكتىسىن قابىلدايمىز.
ەلباسى، قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ كوشباسشىلىعىمەن جاڭا قازاقستاننىڭ تاريحىن جازۋدىڭ بيىك مارتەبەسى مەن جاۋاپكەرشىلىگى ءبىزدىڭ ۇرپاقتىڭ ۇلەسىنە ءتيدى.
ەلباسىنىڭ ماڭىنا توپتاسۋ ارقىلى ءبىز ۇلى جەتىستىكتەرگە تولى جولدان وتتىك جانە بۇگىندە ءوزىمىزدى تاۋەلسىز قازاقستاننىڭ - قۋاتتى ءارى تابىستى مەملەكەتتىڭ ازاماتىمىز دەپ ماقتانىشپەن ايتامىز.
ءبىز، قازاقستان ازاماتتارى، نۇرسۇلتان نازاربايەۆتىڭ تاريحي «تاۋەلسىزدىك تولعاۋىن» نەگىزگە الا وتىرىپ، بولاشاعى ءبىرتۇتاس ەل - ماڭگىلىك ەلدى قۇرۋ جولىندا بىرگەمىز.
ماڭگىلىك ەلدىڭ وزەگىندە قاراپايىم، تۇسىنىكتى جانە ءبىزدىڭ ءارقايسىمىز ءۇشىن ەڭ قىمبات اقيقاتتار - وتباسىمىزدىڭ اماندىعى، قوناقجايلىق جانە ەڭبەكسۇيگىشتىك، تۇراقتىلىق، قاۋىپسىزدىك جانە بىرلىك، ەرتەڭگى كۇنگە دەگەن سەنىم ۇعىمدارى ورنىققان.
ءبىز ماڭگىلىك ەلدىڭ مىزعىماس جەتى تۇعىرىن نىعايتۋعا، ساقتاۋعا جانە ۇرپاقتان ۇرپاققا امانات ەتۋگە شاقىرامىز.
ماڭگىلىك ەل، بۇل- تاۋەلسىزدىك جانە استانا.
ءبىز تاۋەلسىزدىكتى نىعايتۋدىڭ تاريحي ۇلى ميسسياسىنا ادال بولامىز.
ءبىز استانانى حالقىمىزدىڭ گۇلدەنۋى مەن قۋاتىنىڭ جارقىن بەلگىسى رەتىندە ءارقاشان ماقتان تۇتاتىن بولامىز.
ماڭگىلىك ەل، بۇل - جالپىۇلتتىق بىرلىك، بەيبىتشىلىك پەن كەلىسىم.
ءبىزدىڭ وتانىمىز ءبىر، ول - تاۋەلسىز قازاقستان، ءبىزدىڭ ەلىمىز ءبىر - تاعدىرىمىز ورتاق.
بەيبىتشىلىك پەن كەلىسىمنىڭ ۇلى ىسىنە ادال حالىقتىڭ عۇمىرى مىڭجىلدىقتارعا جالعاسادى.
ماڭگىلىك ەل، بۇل - زايىرلى مەملەكەت جانە جوعارى رۋحانيات.
ازاماتتىق جانە رۋحاني قۇندىلىقتاردىڭ بىرلىگى بىزگە ءوز جولىمىزدى تابۋعا جانە ءوزىمىزدى بۇكىل الەمگە ءماشھۇر ەتۋگە مۇمكىندىك بەردى.
ءبىز ەلىمىزدىڭ بىرەگەي رۋحاني كەلبەتىن ايقىندايتىن دىندەر مەن وركەنيەتتەردىڭ جاھاندىق ءۇنقاتىسۋىن ودان ءارى جان- جاقتى دامىتاتىن بولامىز.
ماڭگىلىك ەل، بۇل - يننوۆاتسيا نەگىزىندەگى تۇراقتى ەكونوميكالىق ءوسىم.
ءبىز مەملەكەتتىڭ يندۋستريالىق جانە يننوۆاتسيالىق كۇش- قۋاتىن دامىتىپ، تابيعي رەسۋرستار مەن قورشاعان ورتاعا ۇقىپتىلىقپەن قاراپ، قوعامدا ءبىلىم مەن عالىمدىق كۋلتىن ەلدىڭ زياتكەرلىك ىرگەتاسى رەتىندە بەكىتەتىن بولامىز.
ماڭگىلىك ەل، بۇل - جالپىعا ورتاق ەڭبەك قوعامى.
ەلدىڭ بارلىق تابىستارى مەن جەتىستىكتەرى - بارشا قازاقستاندىقتاردىڭ كۇن سايىنعى قاجىرلى ەڭبەگىنىڭ ناتيجەسى.
ءبىز ەلدىڭ ءاربىر ازاماتىنىڭ جاسامپازدىق الەۋەتىن جۇزەگە اسىرۋ ءۇشىن جاعداي جاساي وتىرىپ، ەڭبەكسۇيگىشتىك جانە جاۋاپكەرشىلىك، ەڭبەك ادامىنا قۇرمەت سىندى قۇندىلىقتارىمىزدى نىعايتامىز.
ماڭگىلىك ەل، بۇل - تاريحتىڭ، مادەنيەت پەن ءتىلدىڭ ورتاقتىعى.
ءبىز ورتاق تاريحي مۇرامىزدى مۇقيات ساقتايتىن بولامىز.
ءبىز قازاقستان حالقىنىڭ مادەني ءارالۋاندىعىن ارتتىرا تۇسەمىز.
ءبىز مەملەكەتتىك ءتىلدى قوعامدى بىرىكتىرۋدىڭ نەگىزى، ۇشتىلدىلىكتى ەلدىڭ باسەكەگە قابىلەتتىلىگىنىڭ باستى شارتى رەتىندە دامىتۋ قاعيداتىن ۇستاناتىن بولامىز.
ءبىز - ۇلكەن ەل - ۇلكەن وتباسىمىز.
ماڭگىلىك ەل، بۇل - ۇلتتىق قاۋىپسىزدىك جانە قازاقستاننىڭ جالپى الەمدىك جانە وڭىرلىك پروبلەمالاردى شەشۋگە جاھاندىق تۇرعىدان قاتىسۋى.
ءبىز ءوز جەتىستىكتەرىمىزدى قورعاۋعا ءتيىسپىز.
ۇلتتىق قاۋىپسىزدىكتى نىعايتۋ ءاربىر ازاماتتىڭ، ءوز ەلى پاتريوتىنىڭ قاسيەتتى پارىزى بولىپ سانالادى.
ءبىز بەيبىتشىلىك پەن كەلىسىم يدەياسىن ىلگەرىلەتە وتىرىپ، ەلىمىزدىڭ حالىقارالىق ارەنادا مويىندالعان بەدەلىن نىعايتا تۇسەتىن بولامىز.
ءبىز ماڭگىلىك ەلدىڭ قاستەرلى قۇندىلىقتارىن باسشىلىققا الامىز.
ءبىز وتانىمىزدىڭ كوك بايراعىن اسقاقتاتا كوتەرىپ، ەلىمىز جەتكەن جاڭا بيىكتەردە جەلبىرەتەتىن بولامىز.
بۇل - ءبىزدىڭ بولاشاق ۇرپاق ءۇشىن، قازاقستان حالقىنىڭ اماندىعى مەن گۇلدەنۋى ءۇشىن جاساعان سانالى تاڭداۋىمىز!
ءبىرتۇتاس ەلىمىز - ماڭگىلىك ەل قۋاتتى بولسىن!
قازاقستاننىڭ ماڭگىلىك مەكەنى - ۇلى دالا ەلىنە باتا قونىپ، باق دارىسىن!
العا، قازاقستان!
