پاۆلودارلىقتار اۋلادا تاياق جەپ تانىلعان قاڭعىباسقا جاڭا ءومىر سىيلادى - كەسكىن

استانا. قازاقپارات - پاۆلودار تۇرعىنى داۋلى روليكتىڭ كەيىپكەرىنە جاڭا ءومىر سۇرۋگە مۇمكىندىك سىيلادى.

ءبىر اي بۇرىن قايىرشىنى جاس جىگىتتىڭ ەش سەبەپسىز ۇرىپ-سوققانى تۋرالى ايتىلعان ەدى. بۇل ءىستى كورگەن قالالىقتار وكىنىش ءبىلدىرىپ، ەر ادامعا كومەك كورسەتە باستاعان. ەندى ۆلاديمير ميليچەنكو جارقىن بولاشاققا جاڭا جوسپارلار قۇرۋعا كىرىسىپ كەتىپتى.

بۇل تۋرالى 31 ارنا حابارلايدى.

ءبىر اي بۇرىن ۆلاديميردى ونىڭ بۇرىنعى ءۇيىنىڭ تۇرعىندارى عانا تانيتىن. ول ادامدار ءۇشىن كوشەدە قوقىس تەرىپ، قايىر تىلەيتىن جان ەدى. ەندى ول - تانىمال ادام. وعان كومەكتەسىپ، قول ۇشىن سوزىپ جاتقان ادامدار بارشىلىق.

«كۇندەلىكتى كارتون جيناپ، ءوزىمنىڭ لاشىعىمدا كۇن كەشەمىن. ءوزىم ومسك قالاسىندا تۋىلدىم. پاۆلودارعا اكەلگەنىنە 6 جىل بولدى»، - دەيدى ۆلاديمير.

ءبىر اي بۇرىن پاۆلودارداعى كوپقاباتتى اۋلالاردىڭ بىرىندە بولعان وقىس وقيعا باقىلاۋ كامەراسىنا ءتۇسىپ قالعان. وندا جاس جىگىت ورىندىقتا وتىرعان كارى كىسىگە كەلىپ، ەسىنەن تانعانشا ۇرا بەرگەن. قايىرشىعا بۇلايشا قوقان- لوققى كورسەتكەن بەينەجازبا الەۋمەتتىك جەلى قولدانۋشىلارىنىڭ اشۋىن تۋعىزدى. اناسى مەن ۇيىنەن ايىرىلعان ۆلاديمير ءوزىنىڭ بۇرىنعى ءۇيىنىڭ جانىنا كەلىپ، وتىرادى ەكەن. ال الەكسەي كوت ەسىمدى ازامات ۆلاديميردى باستان- اياق كيىندىرىپ، ول ءۇشىن باسپانا دايىنداپ، ءتىپتى ۇيالى تەلەفون دا الىپ بەرگەن.

«بىرنەشە جىلدان بەرى ول ءبىرىنشى رەت اۋرۋحانادا تەكسەرۋدەن ءوتتى. قازىر ءبىز ونىڭ قۇجاتتارىن قالپىنا كەلتىرۋگە تىرىسىپ جاتىرمىز»، - دەيدى الەكسەي كوت.

ءبىراز جىلداردان بەرى ۆلاديميردە ءتىپتى جەكە كۋالىك تە بولماپتى. قۇجاتتارىن رەتتەگەننەن كەيىن ۆلاديمير اپكەسىن تاۋىپ العىسى كەلەدى.