رەسەيلىكتەر اقشاعا پۋتين مەن ستاليننىڭ سۋرەتىن سالۋدى ۇسىنادى
رەسەي بانكى ۋادە ەتكەن بانكنوت ديزاينىن جاريا تالقىلاۋدى كۇتپەستەن ازاماتتاردىڭ وزدەرى Change.org. حالىقارالىق الاڭىندا پىكىرسايىسقا باستاماشى بولدى.
سەنبىدەن باستاپ، رەسەيلىكتەر پلاتفورمادا كۋپيۋرالار ديزاينى جونىندە 1300 دەن استام پەتيتسيا جازدى. «بىزدە مۇنداي بەلسەندىلىك بۇرىن-سوڭدى بولماعان ەدى، دەيدى Change.org پورتالىنىڭ شىعىس ەۋروپا جانە ورتالىق ازيا بويىنشا ديرەكتورى دميتري ساۆەلوۆ. - ادەتتە رەسەيلىكتەر ءبىر اي ىشىندە 2 مىڭعا جۋىق پەتيتسيا ۇسىناتىن».
«رەسەيلىكتەردىڭ بۇرىنعى بەلسەندىلىكتەرى قازىرگىگە قاراعاندا اناعۇرلىم باسەڭ بولاتىن. ماسەلەن وتكەن جىلعى داۋ-داماي جول-كولىك وقيعالارى جانە اۋرۋحانالاردىڭ جابىلۋى تۋرالى ورىستەدى»، - دەيدى ول. تانىمال پەتيتسيالار رەيتينگىسىندە ۆلاديۆوستوك كوش باستاپ تۇر. بۇل قالانىڭ پانوراماسى مىڭدىق بانكنوتتاردا بولعان ەدى. ودان ءارى كوستروما مەن 2015 -جىلى 2000 جىلدىعىن وتكىزگەن داعىستانداعى دەربەنت كەلەدى. الەمدەگى تۇشى سۋلى ۇلكەن كول - بايكالدى بەينەلەۋ جونىندەگى ۇسىنىستار دا شەت قالمادى.
ءبىرقاتار داۋىس بەرۋشىلەر جاڭا كۋپيۋرادا كەڭەستىك عارىشكەر يۋري گاگاريننىڭ بەينەسىن سالۋدى ۇسىنادى. ەكى پەتيتسيادا ك س ر و باسشىسى يوسيف ستاليننىڭ پورترەتىنە قولداۋ بىلدىرىلگەن. قازىرگى پرەزيدەنت ۆلاديمير پۋتيننىڭ وبرازىن بانكنوتقا سالۋ جانە ءتىپتى گولليۆۋدتىك جۇلدىز چاك نورريستى دە (ءسىرا ءازىل بولسا كەرەك...) ايتىپ جىبەرگەن.
رەسەي بانكى جاڭا كۋپيۋرالاردى اينالىسقا ەنگىزۋگە نيەتتى ەكەنىن 12 -ساۋىردە ورتالىق بانك باسشىسى ەلۆيرا نابيۋللينا حابارلاعان بولاتىن. ونىڭ ايتۋىنشا، رەسەي بانكى جاڭا بانكنوتتاردا رەسەي ايماقتارىنىڭ سيمۆولدارىن بەينەلەۋدى قۇپتايدى.
رەسەيدىڭ قازىرگى اقشا سەرياسى 1995 -جىلى ەنگىزىلگەننەن كەيىن ونشا كوپ وزگەرىسكە ۇشىراعان جوق. 1998 -جىلى كۋپيۋرالاردان ارتىق نولدەر، 1000 رۋبلدىك كۋپيۋرالار الىنىپ تاستالدى (ونى نومينالى 1 رۋبلدىك شاقالارمەن اۋىستىرىلدى).
قازىرگى سەريا «شۇعىل» دايارلاندى، ءبىراق تا ونىڭ ءومىرى ۇزاق بولاتىنىن ەشكىم دە بىلمەدى، دەيدى گوزناكتىڭ بۇرىنعى سۋرەتشىسى يۋري كوۆەرديايەۆ. سول كەزدە دە اقشاعا اتاقتى رەسەيلىكتەردىڭ سۋرەتتەرى كومپوزيتسيالارىن سالۋ يدەيالارى بولعان. ماسەلەن، پۋشكين پەتەربۋرگپەن، مەندەلەيەۆ ءوزىنىڭ كەستەسىمەن، سۋريكوۆ سۋۆوروۆتىڭ ءالپى جورىعى تۋرالى سۋرەتىمەن، چايكوۆسكيي...
كوۆەرديايەۆتىڭ ايتۋىنشا، جاڭا بانكنوتتاردا جالپى «ايماقتىق» تاقىرىپ ورىن الۋى ءتيىس. «اقشا - مەملەكەتتىڭ بەينەسى، سوندىقتان دا ونى مىقتاپ ويلانۋ قاجەت»، دەيدى ول.
«رەسەيدىڭ بەينەسى» جاڭا بانكنوتتاردا قانداي بولۋى تۋرالى ويلارىن ەل ازاماتتارى بيىلعى جازدا جاڭا كۋريۋرالاردىڭ ديزاينى فەدەرالدىق تەلەارنالاردىڭ بىرىندە اشىق تالقىلاۋ باستالعان كەزدە بىلدىرە الادى.
