22:57, 26 - ءساۋىر 2016 | GMT +5
اقتاۋدا باسىنا وق تيگەن ەر ادام ءتىرى قالدى
استانا. قازاقپارات - ماڭعىستاۋداعى اۋرۋحاناعا باسىنا وق تيگەن ەر ادام جەتكىزىلدى، - دەپ حابارلايدى Tengrinews.kz ءتىلشىسى.
بۇل تۋرالى دارىگەرلەر ايتىپ بەردى.
وقيعا 25- ساۋىردە تۇنگى ۋاقىتتا بولعان. اقتاۋ قالاسىنداعى ماڭعىستاۋ وبلىستىق اۋرۋحاناسىنا جەدەل جاردەم بريگاداسى باسىنا وق تيگەن 23 جاستاعى جىگىتتى جەتكىزگەن. وعان شۇعىل تۇردە وتا جاسالدى.
«ناۋقاستىڭ ءوزى ءۇيىنىڭ اۋلاسىنا شىعىپ، بىرەۋدىڭ اتقانىن ەستىگەنىن، كەيىن قۇلاپ تۇسكەنىن ايتىپ بەردى. ايتۋىنشا، كىمنىڭ اتقانىن ول كورمەگەن»، - دەپ حابارلادى وبلىستىق اۋرۋحانانىڭ باس دارىگەرىنىڭ ورىنباسارى ءۇمىت ءىلياسوۆا.
قازىرگى ۋاقىتتا جىگىتتىڭ جاعدايىن دارىگەرلەر «تۇراقتى اۋىر جاعداي» دەپ باعالاپ وتىر. ول جانساقتاۋ بولىمىنەن بولىمشەگە اۋىستىرىلعان.
پوليتسەيلەر ازىرشە بۇل وقيعاعا قاتىستى تۇسىنىك بەرمەدى.
