ەلباسىنىڭ قاناتتى سوزدەرى: قۇداي قازاقتىڭ پەيىلىنە ساي ەتىپ ۇلان-عايىر جەر بەرگەن
«قازىرگى كەزدە قازاق جەرىنە قاتىستى ماسەلە قوعامىمىزدا قىزۋ تالقىلانىپ جاتقانى بەلگىلى. مەملەكەت باسشىسى بۇگىن وتكەن قازاقستان حالقى اسسامبلەياسىنىڭ ХХІV سەسسياسى بارىسىندا بۇل جونىندەگى بەرىك بايلامىن ءبىلدىردى. «جەر - اتا-بابامىزدان بىزگە ميراس بولىپ قالعان ەڭ باستى قازىنامىز، ۇلتىمىزدىڭ ۇلى بايلىعى. قازاقتىڭ دالاسى - حالىقتىڭ مەنشىگى» دەپ تۇيىندەگەن پرەزيدەنت پىكىرى كوپتىڭ كوڭىلىندەگى تۇيتكىلدى تارقاتىپ، كۇماندى سەيىلتكەندەي.
ەل مەن جەر ۇعىمىن ەشقاشان بولە-جارا قارامايتىن ەلباسىنىڭ بۇل تاقىرىپتا ءسوز ساباقتاۋى، ارينە، ءبىرىنشى رەت ەمەس. وسى ورايدا فەيسبۋك پايدالانۋشىلارى نازارىنا نۇرسۇلتان ءابىش ۇلىنىڭ قازاق جەرى تۋرالى ءتۇرلى كەزدەردە ايتقان قاناتتى سوزدەرىنىڭ توپتاماسىن ۇسىنىپ وتىرمىز»، دەلىنگەن حابارلامادا.
***
قاسيەتتى قازاق جەرى - اتا-بابالارىمىزدىڭ داڭقتى تاريحىن اتىنىڭ تۇياعىمەن جازىپ كەتكەن جەر.
***
قازاق دالاسى - ۇلى تۇركى ەلىنىڭ قارا شاڭىراعى.
***
«كوشپەلىلەر» مال جايىپ وتكەن جەرىنىڭ ءبارىن وزدەرىنىكى ساناي بەرگەن» دەيتىن ساندىراقتى عىلىمي تۇرعىدان اشكەرەلەۋ شارت.
***
مەملەكەتىمىزدىڭ دىڭگەگى - قازاق حالقى. ەل دە، جەر دە - قازاقتىكى. ەل بولۋدىڭ ۇياتى دا - ءبىزدىڭ جۇرتتىڭ موينىندا.
***
جەر جاقىندىعى تاعدىرىڭ مەن تاريحىڭدى جاقىنداستىرماي قويمايدى. جەر تاعدىرى - ەل تاعدىرى.
***
جەر اباتتانسا، ەل اباتتانادى.
***
قازاقتىڭ كەڭ بايتاق جەرىندە اڭىزعا اينالماعان تۇس ءتىپتى از، ءبارى دە قاستەرلى ولكە، قاسيەتتى مەكەن.
***
جەردەن وتكەن بايلىق جوق: جەر بولسا - ەل بولادى، ەل بولسا - ەر بولادى.
***
قۇداي قازاققا قىرىن قاراماعان: پەيىلىنە ساي ەتىپ ۇلان-عايىر جەر بەرگەن، استى-ءۇستىن تولتىرىپ كەن بەرگەن، مەيىربان، اق كوڭىل، ادال ەل بەرگەن، جانى ءۇشىن مالىن، ارى ءۇشىن جانىن ساداعا ەتەتىن ەر بەرگەن.
***
قازاقتىڭ قاسيەتتى جەرىنىڭ استى دا - بايلىق، ءۇستى دە - بايلىق.
***
ەلىڭنىڭ ۇلى بولساڭ، ەلىڭە جانىڭ اشىسا، ازاماتتىق نامىسىڭ بولسا، قازاقتىڭ ۇلتتىق جالعىز مەملەكەتىنىڭ نىعايىپ-كوركەيۋى جولىندا جان تەرىڭدى سىعىپ ءجۇرىپ ەڭبەك ەت. جەردىڭ دە، ەلدىڭ دە يەسى ءوزىڭ ەكەنىڭدى ۇمىتپا!
