ەلباسى «جۇلدىزدار توعىسقاندا» فيلمىنىڭ العاشقى كورسەتىلىمىن تاماشالادى - فوتو
رەسەيلىك كينو مامانى، رەجيسسەر سەرگەي سنەجكيننىڭ تۋىندىسى ق ر پرەزيدەنتىنىڭ ءومىرى مەن قىزمەتىنە ارنالعان «ەلباسى جولى» كينوەپوپەياسىنىڭ جالعاسى بولىپ تابىلادى.
ايتا كەتەرلىگى، جاڭا فيلم نۇرسۇلتان نازاربايەۆتىڭ ومىرىندەگى اسا قىزىقتى كەزەڭدى، ەلباسىنىڭ 1984-جىلى قازاق ك س ر مينيسترلەر كەڭەسىنىڭ ءتوراعاسى قىزمەتىنە تاعايىندالىپ، 1991-جىلى تاۋەلسىز قازاقستان رەسپۋبليكاسىنىڭ پرەزيدەنتى بولىپ سايلانعانعا دەيىنگى كەزەڭدى قامتىپ وتىر.
«ءبىز ءۇشىن، اسىرەسە جەكە وزىمە بۇل ۇلكەن جاۋاپكەرشىلىك بولدى. سەبەبى تاعدىرى ۇلكەن تۇلعا تۋرالى كينو ءتۇسىرۋ وڭاي شارۋا ەمەس. وسى جايت، بىزگە كۇش بەرىپ وتىردى. قىرۋار ادامنىڭ ەڭبەگى ءبىر كينودا توعىسىپ وتىر، سىزدەرگە ۇنايدى دەپ سەنەمىز. سەبەبى بۇل ەموتسياعا تولى كوركەم فيلم، بۇل دراما، سوندىقتان دا ول ماعان جانە مەنىڭ كومانداما جاڭا تاجىريبە بەردى»، - دەيدى رەجيسسەر سەرگەي سنەجكين.
فيلمدى تۇسىرۋگە قازاقستان مەن رەسەي كينوماماندارىنىڭ جوعارى بىلىكتى شىعارماشىلىق كوماندالارى اتسالىسقان. كينو ەكى ەلدە ءتورت اي بويى ءتۇسىرىلدى. تۋىندى نەگىزىنەن ەلىمىزدىڭ جاستارىنا ارنالادى.
ايتا كەتەيىك، فيلم سيۋجەتى بويىنشا اعىلشىن جازۋشىسى دجەرەمي ۆيلسون نۇرسۇلتان نازاربايەۆپەن سۇحباتتاسۋ ماقساتىندا ونىمەن كەزدەسۋدىڭ رەتىن ىزدەيدى. الايدا جوسپارلانعان سۇحبات جاس مەملەكەتتىڭ قۇرىلۋىن باياندايتىن تاريحي اڭگىمەگە اينالىپ كەتەدى. جۋرناليست نۇرسۇلتان نازاربايەۆ ەسكە العان وقيعالاردىڭ كۋاسى بولىپ، 1950-1991-جىلدار اراسىندا وربىگەن وقيعالارعا «ساپار شەگەدى».
كارتينا 28- ساۋىردەن باستاپ قالىڭ جۇرتشىلىق نازارىنا ۇسىنىلادى دەپ جوسپارلانۋدا.
باستى ءرولدى ەلىمىزدىڭ تانىمال اكتەرى بەرىك ايتجانوۆ سومداعان.
اۆتور: جاسۇلان جولدىبايەۆ
