پرەزيدەنت: «ماڭگىلىك ەل» پاتريوتتىق اكتىسى - حالقىمىزدىڭ بۇگىنگى ومىرىنە دە، بولاشاعىنا دا تىكەلەي ىقپال ەتەتىن ماڭىزدى قۇندىلىقتاردىڭ جيىنتىعى
«وسى ماڭىزدى قۇجاتتى كوپتەن بەرى دايىندالىپ، ءدال بيىلعى مەيىرلى جىلدا قابىلدانۋى ايرىقشا ماڭىزعا يە. «نادان حالىق ءبىر جىلىن، اقىلدى حالىق 1 عاسىرىن، دانا حالىق ماڭگىلىك بولاشاعىن ويلايدى» دەگەن بار. ءبىز بۇل جولدا ماڭگىلىك بولاشاعىن ويلايتىن دانا حالىق بولايىق. پاتريوتتىق اكت - حالقىمىزدىڭ بۇگىنگى ومىرىنە دە، بولاشاعىنا دا تىكەلەي ىقپال ەتەتىن ماڭىزدى قۇندىلىقتاردىڭ جيىنتىعى. قۇجاتتىڭ ءاربىر تارماعى حالقىمىزدىڭ جۇرەگىنە بەرىك ورىن الارىنا سەنەمىن»، - دەدى ن. نازاربايەۆ قازاقستان حالقى اسسامبلەياسى كەڭەسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» اتتى XXIV سەسسياسىندا.
ونىڭ ءسوزى بويىنشا، پاتريوتتىق اكتىدە كورسەتىلگەن بارلىق ماسەلەلەر - قازاق حالقىنىڭ كوكەيىندە جۇرگەن، اتا- بابامىزدىڭ كوكەيىندە جۇرگەن ماسەلە.
«سوندىقتان ەلىمىزدەگى باسقا اعايىنىمىزدى، ءبىزدىڭ باسقا ازاماتتارىمىزدى وسىعان باۋلۋ ءۇشىن، ءتۇسىندىرۋ ءۇشىن بارلىعىمىز جۇمىلا جۇمىس جاساۋىمىز كەرەك. پاتريوتتىق اكت - تاۋەلسىز قازاقستاننىڭ نەگىزىن قالاعان بۋىننىڭ كەيىنگى ۇرپاققا اماناتى. ءار ادامنىڭ جۇرەگىنەن ورىن الاتىن نارسە. ونداعى قۇندىلىقتاردى ماڭگى قاستەرلەپ، دامىتا بىلسەك - «ماڭگىلىك ەل» بولۋ دەگەن وسى. ءاربىر قازاقستاندىقتىڭ ساناسىنا وسىنى ءسىڭدىرۋ - ءبىزدىڭ پارىزىمىز. «ماڭگىلىك ەلدىڭ» مىزعىماس قۇندىلىقتارىن بىرلىكتى بارىنەن بيىك قوياتىن ءبىرتۇتاس ەل عانا جۇزەگە اسىرا الادى. ءبىز وسىنداي بولاشاعى ءبىرتۇتاس ەلدى جاسايىق دەپ وتىرمىز»، - دەپ اتاپ ءوتتى ەلباسى.
اۆتور: جاسۇلان جولدىبايەۆ
