افريكالىق فۋتبولشى تۆۋماسي قازاقستاندا نەدەن قينالىپ جۇرگەنىن ايتىپ بەردى
ەكى مارتە قازاقستان چەمپيونى بولىپ ۇلگەرگەن 21 جاستاعى فورۆارد ءبىزدىڭ ەلدە وزىنە ەڭ قيىنعا سوققانى اۋا رايى، اسحاناسى جانە ءتىل ماسەلەسى ەكەنىن مالىمدەدى.
«ەڭ قيىنى - كليمات جاعدايى. اۋا رايى مۇندا كۇن سايىن وزگەرەتىن سياقتى، ءبىراق سىزدەر بۇعان ۇيرەنىپ قالعانسىزدار. مۇندا تاعام باسقا. تاعى ءبىر قيىنى - ءتىل. كەيبىر سوزدەردى، ءسوز تىركەستەرىن تۇسىنەمىن، مەنىڭشە، ءتىلدى مەڭگەرىپ السام وڭاي بولادى»، - دەپ كەلتىرەدى فۋتبولشىنىڭ ءسوزىن Vesti.kz پورتالى.
تۆۋماسيدىڭ ايتۋىنشا، ماقساتقا جەتۋ ءۇشىن قيىندىقتاردى جەڭە ءبىلۋ كەرەك. «بار كۇشىڭدى سال، سول كەزدە عانا بولاشاعىڭا جانە مۇمكىندىكتەرىڭە سەنىممەن قاراي الاسىڭ. ەڭبەكسىز ەشتەڭە دە ونبەيدى. ءوز ارمانىڭ جايلى ءاردايىم ويلاۋ كەرەك، ءوزىڭ ءۇشىن جانە وتباسىڭ ءۇشىن قولدان كەلگەنىن جاساۋ كەرەك»، - دەيدى سپورتشى.
«مەن سىزدەردىڭ ەلگە باسقا فۋتبول مەن مادەنيەتتى ءبىلۋ ءۇشىن كەلدىم. مۇندا كەلىپ، جاقسى جانە قايىرىمدى ادامداردى كورگەنىمدە قۋاندىم»، - دەيدى ول.
گانالىق فۋتبولشى كوماندالاستارىن دا تىلگە تيەك ەتتى. «قازاقستاندىق فۋتبولشىلار وزدەرىنە سەنىمدى. مانساپ جولىندا قانداي مەجەگە جەتۋى كەرەك ەكەنىن بىلەدى. ولار قايىرىمدى، دوس بولا بىلەتىن، سەنۋگە بولاتىن ادامدار. وسىنداي ويىنشىلارمەن ءبىر كوماندادا بولۋ مەنى شابىتتاندىرا تۇسەدى. ءبىز ءبىر- بىرىمىزبەن ءجيى اڭگىمەلەسەمىز، بۇل ماعان قيىن ساتتەردە كومەككە كەلەدى».
فورۆارد قازاقستاندىق چەمپيونات جايلى ايتا كەلە، ماتچتارعا ادامداردىڭ كوپ جينالمايتىنىنا كوڭىلى تۇسەتىنىن جەتكىزدى. «جانكۇيەرلەر ويىنشىلارعا قولداۋ ءبىلدىرۋ كەرەك. ولاردىڭ قولداۋى فۋتبولشىلاردى ۇزدىك بولۋعا شابىتتاندىرادى، مۇنداي شابىتسىز فۋتبولشىلار جەتىستىككە جەتە المايدى. مىنە، وسى سەبەپتەن دە جانكۇيەرلەر ەل چەمپيوناتىنداعى ماتچتارعا كەلۋى كەرەك. وسىنىڭ ارقاسىندا فۋتبولدىڭ دەڭگەيى وسەدى - استانادا عانا ەمەس، بۇكىل قازاقستان بويىنشا»، - دەپ قورىتىندىلادى ءسوزىن تۆۋماسي.
Kaz.tengrinews.kz
