اقتوبەدە پوليتسەي جۇرگىزۋشىنى توقتاتۋ ءۇشىن تاپانشامەن اتتى
كەيىن بەلگىلى بولعانداي، كولىكتى باسقارعان 23 جاستاعى اقتوبە تۇرعىنى بۇرىن كريمينالدىق(قىلمىستىق) ەسەپتە بولعان.
ول جانە بۇرىن قىلمىستىق ەسەپتە تۇرعان 27 جاستاعى جولاۋشىمەن بىرگە كولىكتە سىرا ىشكەن.
پوليتسەيدىڭ قۇجات كورسەتۋ تالابىنا باعىنباعان جۇرگىزۋشى ءتارتىپ ساقشىسىن قاعىپ كەتكەن. پوليتسيانىڭ اعا سەرجانتى ت. بەكەتوۆ كولىكتىڭ كاپوتىنا(الدىڭعى جاعى) سەكىرىپ شىعادى. ەكىنشى پوليتسەي، اعا سەرجانت د. قالىموۆ «Skoda Rapid» قىزمەتتىك كولىگىمەن زاڭ بۇزۋشىنىڭ سوڭىنان قۋعان.
كاپوتتا جاتقان بەكەتوۆ ەسكەرتۋ رەتىندە اسپانعان قارۋىمەن وق اتقان. جۇرگىزۋشى مۇنى ەلەمەگەن. الايدا كولىك باتپاقتى سۋعا كىرىپ كەتىپ توقتاعان.
بەكەتوۆ اشىق تەرەزە ارقىلى كولىككە كىرمەك بولعان. «مازدا» جولاۋشىسى سىرا بوتەلكەسىن سىندىرىپ، ونىڭ سىنىعىمەن پوليتسەيدىڭ اياعىن جاراقاتتادى. ءتارتىپ ساقشىسى «مازدا» جولاۋشىسىنىڭ اياعىنا اتىپ، ارىپتەسىمەن بىرگە زاڭ بۇزۋشىلاردى ۇستادى.
وبلىستىق ءى ءى د باسپا ءسوز قىزمەتىنىڭ حابارلاۋىنا، «مازدا» جۇرگىزۋشىسى ۇستالىپ، ۋاقىتشا ۇستاۋ وقشاۋلاعىشىنا قامالدى. ال، ەكىنشىسى جاراقاتىمەن اقتوبە اۋرۋحاناسىنا جەتكىزىلدى. پوليتسيانىڭ اعا سەرجانتى ت. بەكەتوۆتىڭ اياعىندا تىلىنگەن جاراقاتى بويىنشا اۋرۋحانادا كومەك كورسەتىلدى.
اتالعان وقيعا بويىنشا ق ر ق ك- نىڭ 380-بابى بويىنشا قىلمىستىق ءىس قوزعالدى. بۇل باپ بويىنشا ايىپتىعا 5 تەن 10 جىلعا دەيىن باس بوستاندىعىنان ايىرۋ قاراستىرىلعان.
