دەنساۋلىق: وتپە جەل تۇماۋ شاقىرادى ما؟

 استانا. قازاقپارات - وتپە جەلگە ءار ەلدىڭ حالقى ءارتۇرلى قارايدى. مىسالى، ەۋروپالىقتاردىڭ كوبى بولمەنىڭ ەسىگى مەن تەرەزەسىن ءبىر ۋاقىتتا اشىپ قويسا، تۇماۋ تەز ۇستايتىنىن ايتسا، امەريكالىقتار كەرىسىنشە پاتەردە ازداپ جەل بولعاندىعىن دۇرىس كورەدى.

نەگىزىنەن، تۇماۋ جايدان- جاي بولمايدى. ءاربىر تۇماۋدىڭ، نە تاماق اۋرۋىنىڭ ءبىر عانا سەبەبى بار، ول - ۆيرۋس. جاي عانا سامال جەلدىڭ ءوزى ءبىر ادامنان ەكىنشى ادامعا ميكرو ورگانيزمدەردى بەلسەندى تاسىمالدايدى، ياعني وتپە جەل ۆيرۋستىڭ اۋا جولىمەن تارالۋىنا بىردەن- ءبىر سەبەپكەر.

سونداي- اق، اۋرۋ تۋعىزاتىن ميكرواعزالار ادام تولىق ساۋ بولعان ۋاقىتتىڭ وزىندە دە جۇتقىنشاقتا تىرشىلىك ەتەدى. تىنىس جولدارىنىڭ شىرىشتى قابىعى جۇتقىنشاقتاعى ءتۇرلى ۆيرۋستار مەن باكتەريالاردىڭ اعزاعا ەنىپ كەتۋىنەن ساقتاپ تۇرادى.

ادام اعزاسى وتپە جەلدەن سۋىقتاپ قالسا، قان تامىرلارىنىڭ تارىلىپ، يممۋندىق جۇيەگە از جاسۋشالار تاسىمالدايتىن بولعاندىقتان اۋرۋ تۋعىزعىشتار بەلسەندى تۇردە كوبەيە تۇسەدى. ءبىراق جىلى مەن سۋىقتىڭ جىلدام الماسىپ تۇرۋى اعزانىڭ قورشاعان ورتاداعى وزگەرىستەرگە تەز جاۋاپ قايتارۋعا جاتتىقتىراتىندىعىن ەسكەرسەك، وتپە جەل ءبىر جاعىنان پايدالى ەكەندىگىن كورەمىز. سالقىن اۋا جازدىڭ ىستىق كۇنىندە اعزانىڭ جىلىلىق سوققى الۋىنا جول بەرمەيدى. تۇراقتى جىلى اۋادا ۆيرۋستار قوزعالمالى سۋىق اۋاعا قاراعاندا جىلدام كوبەيەتىندىگىن ءبىلىپ جۇرگەندىگىمىز ابزال.

 قورىتا كەلگەندە دارىگەرلەر ءالى كۇنگە دەيىن وتپە جەل تۋرالى ورتاق پىكىرگە كەلمەدى. ەگەر وتپە جەلدى جاساۋ ارقىلى تەمپەراتۋرانىڭ تۇراقتىلىعىن ساقتاپ، اعزانى شىنىقتىرىپ تۇرساق، ول تۇماۋعا شالدىعۋدىڭ الدىن الۋى دا مۇمكىن.

yvision.kz سايتىنان الىندى.