مامىردىڭ سوڭىنا دەيىن بالىق اۋلاۋعا تىيىم سالىنعانىنا قاراماستان اۋ قۇرعانداردىڭ سانى ازايار ەمەس

شىمكەنت. قازاقپارات - وڭتۇستىكتە براكونەرلەر ىرىققا باعىنباي تۇر. مامىر ايىنىڭ سوڭىنا دەيىن بالىق اۋلاۋعا تىيىم سالىنعانىنا قاراماستان اۋ قۇرىپ، قارماق سالعانداردىڭ قاتارى سەيىلەر ەمەس.

كوكساراي كونتررەتتەگىشىنىڭ ماڭايىن تورۋىلداپ ءجۇرىپ، قارماق سالىپ وتىرعان ەكى جىگىتتى كەزىكتىردىك. ولار ۇستالعاننان كەيىن ۇيالى تەلەفون ارقىلى الدەبىرەۋلەرگە حابارلاسىپ، كومەك سۇراپ جاتتى.

بالىق اۋلاۋعا كەلگەندەردىڭ ەندى ءبىرى ورداباسى اۋدانىنىڭ تۇرعىندارى ەكەن. ءتورت جىگىت ۇرمەلى قايىقپەن جاقسى دايىندالىپ كەلىپتى. ولار بۇل ارەكەتكە بىلمەستىكتەن بارعانىن مويىندادى.

ودان كەيىن شاردارا سۋ قويماسىنىڭ № 4 -ۋچاسكەسىندە دە براكونەرلەر قولعا ءتۇستى. ماقتاارال اۋدانىنىڭ تۇرعىندارى بالىقتى ءۇيىپ اۋلاپتى. كولىكتەرىنىڭ جۇك سالعىشى سازاندارعا تولى.

قۇزىرلىلار يەسىز اۋلاردى دا تاركىلەدى. رەيد كەزىندە ەڭ سوراقىسى - ەلەكتر قۋاتىنىڭ كۇشىمەن سۋ جاندىگىن قىرىپ جاتقاندار دا اشكەرە بولدى. ولارعا قاتىستى ەكى قىلمىستى ءىس قوزعالدى.

اۋىل شارۋاشىلىعى مينيسترلىگىنىڭ بۇيرىعىنا سايكەس 18 -ساۋىردەن باستاپ ءوڭىردىڭ بارلىق وزەنى مەن سۋ قويمالارىندا بالىق اۋلاۋعا قاتاڭ تىيىم سالىنعان. ونىڭ ورىندالۋى مامىر ايىنىڭ سوڭىنا دەيىن باقىلانادى. قارماققا بالىق ەمەس، ءوزىڭىز ءىلىنىپ قالمايىن دەسەڭىز، كوكتەم اياقتالمايىنشا اۋ سالۋدان اۋلاق بولىڭىز، دەپ جازادى kz.otyrar.kz.