الماتىدا بوكستان ك س ر و سپورت شەبەرى ا. تشانوۆتىڭ جۇلدەسىنە ارنالعان حالىقارالىق تۋرنير باستالدى
بۇل سپورتتىق شارا ق ر تاۋەلسىزدىگىنىڭ 25 جىلدىعىنا ارنالىپ وتىر. رەسپۋبليكالىق سپورت كوللەدجىندە بيىل ءتورتىنشى رەت ءوتىپ جاتقان بۇل تۋرنيرگە قازاقستاننىڭ وبلىستىق قۇراما كوماندالارىمەن قاتار، رەسەي، موڭعوليا، قىرعىزستان، وزبەكستان جانە تاجىكستان ەلدەرىنىڭ جاستار قۇراماسى جانە رەسپۋبليكالىق سپورت كوللەدجىنىڭ كومانداسى قاتىسۋدا.
جارىستىڭ سالتاناتتى اشىلۋ ءراسىمى بارىسىندا گرەك-ريم كۇرەسىنەن ماسكەۋ وليمپياداسىنىڭ چەمپيونى جاقسىلىق ۇشكەمپىروۆ، گرەك-ريم كۇرەسىنەن سەۋل وليمپياداسىنىڭ كۇمىس جۇلدەگەرى داۋلەت تۇرلىحانوۆ، الماتى قالالىق دەنە شىنىقتىرۋ جانە سپورت باسقارماسى باستىعىنىڭ ورىنباسارى رۇستەم بايسەيىتوۆ ءسوز سويلەپ، امالبەك قوزىباق ۇلىنا دەنساۋلىق تىلەپ، مىناداي قيىن كەزەڭگە قاراماستان جارىس وتكىزىپ جاتقانىنا ريزاشىلىقتارىن ءبىلدىرىپ، بوكسشىلارعا ساتتىلىك تىلەدى.
جۋرناليستەرگە بەرگەن سۇحباتىندا رەسپۋبليكالىق سپورت كوللەدجىنىڭ ديرەكتورى امالبەك تشانوۆ تۋرنيردى ۇيىمداستىرۋداعى ماقسات-مىندەتتەر جايىندا اڭگىمەلەدى.
«تۋرنيردى ۇيىمداستىرۋداعى ماقسات - قازاق بوكسىن ودان ءارى دامىتۋ. جاس بوكسشىلاردىڭ شەبەرلىكتەرىن ارتتىرۋ. تەك جاتتىعۋ جاساۋدان ەشتەڭە شىقپايدى. بوكسشىلار وسىنداي جارىستاردا شىنىعادى، تاجىريبە جيناقتايدى. ەگەر بوكسشىلارىمىز مىقتى بولسا، مۇنداي تۋرنيرلەرگە شەت مەملەكەتتەر دە مىقتى بوكسشىلارىن جىبەرەدى. بۇگىنگى تۋرنيرگە بارلىعى 10 سالماق دارەجەسى بويىنشا 110 سپورتشى قاتىسىپ جاتىر. تۋرنيردىڭ ساپاسىن ارتتىرۋ ماقساتىندا ءار وبلىستان كەلەتىن كوماندالار قۇرامىنا شەكتەۋ قويدىق. ياعني، ءار وبلىس ءوزىنىڭ قالاعان سالماق دارەجەلەرى بويىنشا 6 بوكسشى عانا جىبەرە الادى»، - دەدى ا. تشانوۆ.
سونىمەن قاتار، امالبەك قوزىباق ۇلى بۇل حالىقارالىق تۋرنيردىڭ بيىل تۇڭعىش رەت رەسمي تۇردە «سپورت شەبەرى» اتاعىن بەرە الاتىن رەسپۋبليكالىق جارىستاردىڭ كۇنتىزبەسىنە ەنگىزىلگەندىگىن جەتكىزدى.
«بۇعان دەيىن بوكسشىلارعا «سپورت شەبەرى» مارتەبەسىن ءبىر تۋرنيردى جەڭسە، بەرە بەرەتىن. ەندى ولاي بولمايدى. قازىر ەلىمىزدە جاستار اراسىندا وتكىزىلەتىن 3-4 رەسمي تۋرنير بار. بۇگىنگى تۋرنير سول جارىستاردىڭ قاتارىنا ەندى. ەندى، سول تۋرنيرلەرگە قاتىسىپ، جەڭىسكە جەتىپ، بەلگىلى ءبىر ۇپاي سانىنا قول جەتكىزگەن بوكسشىلارعا عانا «سپورت شەبەرى» اتاعى بەرىلەتىن بولدى. مەن بۇل جاڭا ەرەجەنى تولىق قولدايمىن. سوندا جاستار مۇنىڭ جاي بەرىلە سالاتىن اتاق ەمەستىگىن، بۇل ءۇشىن ايانباي تەر توگۋ كەرەكتىگىن تۇسىنەتىن بولادى. سايكەسىنشە، شەبەرلىكتەرى دە ارتادى. ءبىر سوزبەن ايتقاندا، بوكستىڭ دەڭگەيىن بارىنشا كوتەرۋىمىز قاجەت. ويتكەنى بوكس، قازاقستاننىڭ ۇلتتىق سپورت تۇرلەرىنىڭ بىرىنە اينالعان ونەر»، - دەدى ا. تشانوۆ.
ايتا كەتەلىك، تۋرنير بەس كۇنگە سوزىلادى. فينالدىق سايىستار 29- ءساۋىر كۇنى كۇندىزگى ساعات 12:00 دە رەسپۋبليكالىق كوللەدجدىڭ سپورت كەشەنىندە باستالادى. جەڭىمپازدار، ديپلومدارمەن جانە ەستەلىك سىيلىقتارمەن ماراپاتتالادى.
اۆتور: ايبوتا جاپپاربەرگەن
