ن. نازاربايەۆ: قازاقستان مەن يسپانيانىڭ ىنتىماقتاستىعىن كەڭەيتۋگە نەگىز بولاتىن بىرلەسكەن جوبالار بار

استانا. قازاقپارات - مەملەكەت باسشىسى يسپانيا كورولدىگىنىڭ سىرتقى ىستەر ءمينيسترى حوسە مانۋەل گارسيا- مارگالونى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋ بارىسىندا قازاقستان-يسپانيا ىنتىماقتاستىعىنىڭ نەگىزگى باعىتتارى تالقىلاندى، سونداي-اق ەكى ەلدىڭ بىرلەسكەن جۇمىسىنىڭ پەرسپەكتيۆالى سالالارى قاراستىرىلدى.

نۇرسۇلتان نازاربايەۆ ەكى مەملەكەتتىڭ ءوزارا ءىس-قيمىلىن نىعايتۋعا وڭ ىقپال ەتىپ وتىرعان قازاقستان مەن يسپانيانىڭ ستراتەگيالىق سەرىكتەستىگىنە نازار اۋداردى.

مەملەكەت باسشىسى تەمىرجول ماشينالارىن جاساۋ، مۇناي-گاز، كوممۋنيكاتسيا جانە قۇرىلىس سالالارىندا ءبىرقاتار بىرلەسكەن جوبالار بار ەكەنىن، ولار ىنتىماقتاستىق اياسىن كەڭەيتە تۇسۋگە ەلەۋلى نەگىز بولىپ وتىرعانىن اتاپ ءوتتى.