ەلباسى تۋرالى «جۇلدىزدار توعىسقاندا» فيلمى كورەرمەنگە جول تارتادى
بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر مادەنيەت جانە سپورت مينيسترلىگىنىڭ تاپسىرىسىمەن تۇسىرىلگەن «جۇلدىزدار توعىسقاندا» كوركەم فيلمىنىڭ جالپى ۇلتتىق تۇساۋ كەسەرىنە ارنالعان باسپا ءسوز ءماسليحاتى بولىپ ءوتتى.
رەسەيلىك كينو مامانى، رەجيسسەر سەرگەي سنەجكيننىڭ تۋىندىسى ق ر پرەزيدەنتىنىڭ ءومىرى مەن قىزمەتىنە ارنالعان «ەلباسى جولى» كينوەپوپەياسىنىڭ جالعاسى بولىپ تابىلادى. ايتا كەتەرلىگى، جاڭا فيلم نۇرسۇلتان نازاربايەۆتىڭ ومىرىندەگى اسا قىزىقتى كەزەڭدى، ەلباسىنىڭ 1984 -جىلى قازاق ك س ر مينيسترلەر كەڭەسىنىڭ ءتوراعاسى قىزمەتىنە تاعايىندالىپ، 1991 -جىلى تاۋەلسىز قازاقستان رەسپۋبليكاسىنىڭ پرەزيدەنتى بولىپ سايلانعانعا دەيىنگى كەزەڭدى قامتىپ وتىر. باستى رولدى ەلىمىزدىڭ تانىمال اكتەرى بەرىك ايتجانوۆ سومداعان.
«شىندىعىندا بۇل قاراپايىم تۋىندى ەمەس، كينونى ەكرانعا شىعارۋ ارقىلى ەلىمىزدىڭ تاريحىنا باسقاشا كوزقاراسپەن قاراۋعا دا بولادى. ويتكەنى، شىندىعىندا تاۋەلسىزدىك جىلدارى قاراپايىم حالىق بىلە بەرمەيتىن كوپتەگەن وقيعالار ورىن الىپ جاتتى، بۇل وقيعالار ءبىزدىڭ ەلىمىزگە عانا ەمەس، بۇكىل الەمنىڭ وزگەرۋىنە قاتىستى بولاتىن. جالپى، ەلباسىنىڭ وتكەن ءومىر جولىنا ۇڭىلسەك، ن. نازاربايەۆتىڭ ءاربىر قادامى تۋرالى جەكە- جەكە فيلم تۇسىرۋگە دە بولاتىنداي. دەگەنمەن، سەرگەي سنەجكيننىڭ شەبەرلىگى ارقاسىندا ءبىز ەلىمىزدىڭ ۇلكەن تاريحي بەتبۇرىستار مەن وزگەرىستەر كەزەڭىن ءۇش ساعاتتىق تۋىندىعا سىيعىزىپ وتىرمىز» ، - دەدى بريفينگتە مادەنيەت جانە سپورت ءمينيسترى ارىستانبەك مۇحامەدي ۇلى.
ونىڭ سوزىنە قاراعاندا، فيلمدى تۇسىرۋگە قازاقستان مەن رەسەي كينوماماندارىنىڭ جوعارى بىلىكتى شىعارماشىلىق كوماندالارى اتسالىسقان. كينو ەكى ەلدە ءتورت اي بويى ءتۇسىرىلدى.
ءمينيستردىڭ ايتۋىنشا، فيلم نەگىزىنەن ەلىمىزدىڭ جاستارىنا ارنالادى.
ايتا كەتەيىك، فيلم سيۋجەتى بويىنشا اعىلشىن جازۋشىسى دجەرەمي ۆيلسون نۇرسۇلتان نازاربايەۆپەن سۇحباتتاسۋ ماقساتىندا ونىمەن كەزدەسۋدىڭ رەتىن ىزدەيدى. الايدا جوسپارلانعان سۇحبات جاس مەملەكەتتىڭ قۇرىلۋىن باياندايتىن تاريحي اڭگىمەگە اينالىپ كەتەدى. جۋرناليست نۇرسۇلتان نازاربايەۆ ەسكە العان وقيعالاردىڭ كۋاسى بولىپ، 1950-1991 -جىلدار اراسىندا وربىگەن وقيعالارعا «ساپار شەگەدى» .
كارتينا 28 - ساۋىردەن باستاپ قالىڭ جۇرتشىلىق نازارىنا ۇسىنىلادى دەپ جوسپارلانۋدا.
اۆتور: قانات مامەتقازى ۇلى
