جەمقورلىق تۋرالى زەرتتەۋ ماڭعىستاۋ وبلىسىنىڭ اكىمىن شوشىتتى

استانا. قازاقپارات - جۋىردا «اتامەكەن» ۇلتتىق كاسىپكەرلەر پالاتاسىنىڭ تاپسىرىسىمەن بۇكىل وڭىرلەردە «ىسكەرلىك كليمات» اتتى الەۋمەتتىك زەرتتەۋ ءجۇرىپ، ەڭ جەمقور وبلىستار انىقتالعان بولاتىن.

كوش ءتىزىمىن ماڭعىستاۋ وبلىسى باستاعان دەپ حابارلايدى skifnews.kz.

الايدا، ءوڭىر باسشىسى اليك ايداربايەۆ اپتا باسىندا جۋرناليستەرمەن كەزدەسىپ، زەرتتەۋ ناتيجەلەرىنىڭ شىندىققا جاناسپايتىنىن، ونداعى مالىمەتتەردى قايتا تەكسەرىپ كورۋ كەرەكتىگىن ايتتى. ارتىنشا، «اتامەكەن» ۇ ك پ ءوزىنىڭ رەسمي سايتىنان الەۋمەتتىك زەرتتەۋدىڭ ناتيجەسىن مۇلدەم الىپ تاستادى.

«ىسكەرلىك كليمات» جوباسى ەلىمىزدە بىرنەشە جىلدان بەرى جۇرگىزىلىپ كەلەدى. ول وبلىستاردىڭ تەك جەمقورلىق رەيتينگىن جاساپ قانا قويماي، وڭىرلەردەگى بيزنەس كليماتتىڭ قانداي دەڭگەيدە ەكەنىن انىقتايتىن قۇرال. ونىڭ اياسىندا كاسىپكەرلەر اراسىندا ساۋالناما جۇرگىزىلىپ، بيزنەستەگى پروبلەمالار انىقتالادى.

الايدا، جوبانىڭ بيىلعى ناتيجەلەرى ماڭعىستاۋ وبلىسىنىڭ اكىمى اليك ايداربايەۆتى شوشىتقانداي. «ماسەلە ماڭعىستاۋ وبلىسىنىڭ «قارا تىزىمدەگى» ءبىرىنشى ورنى ەمەس، ماسەلە وبلىستارداعى كورسەتكىشتەردىڭ 50-70 پايىزعا دەيىنگى ايىرماشىلىعى» دەيدى اكىم. ونىڭ ايتۋىنشا، ءبىر مەملەكەتتە مۇنداي الشاقتىقتاردىڭ ورىن الۋى مۇمكىن ەمەس، ارى كەتسە 10-20 پايىزدىڭ شاماسى بولۋى ءتيىس دەيدى ول جۋرناليستەرمەن بولعان كەزدەسۋدە.

«مەنىڭ پىكىرىمشە، رەيتينگتەردىڭ، الەۋمەتتىك ساۋالنامالاردىڭ بەلگىلى ءبىر ماقساتى بولۋى ءتيىس. ماسەلەن، ەگەر ىسكەرلىك كليماتتىڭ دەڭگەيى انىقتالسا، ونىڭ ناتيجەسى بويىنشا كەمشىلىكتەردى جوندەيتىن نۇسقاۋلىقتار جاسالۋى كەرەك. ال، اتالعان رەيتينگپەن تانىسىپ كورگەن كەزدە ءبىز جاعامىزدى ۇستادىق. بۇعان دەيىن «اتامەكەن» ۇ ك پ باسشىلارى ماڭعىستاۋدى ءجيى ماقتاپ، ءبىزدى اكىمدىك پەن بيزنەس-قاۋىمداستىق اراسىندا ءساتتى بايلانىس ورناعان 6 وبلىستىڭ بىرىنە جاتقىزعان. ال، ولاردىڭ جۇرگىزگەن رەيتينگىن قاراساڭىز وبلىستارداعى كورسەتكىشتەر ءبىر بىرىنەن تىم الشاق، ايىرماسى 50، 60، 70 پايىزعا دەيىن. ءبىر مەملەكەتتىڭ ىشىندە مۇنداي الشاقتىقتاردىڭ بولۋى مۇمكىن بە؟» - دەيدى ايداربايەۆ زەرتتەۋ ناتيجەلەرىنە كۇدىكپەن قاراپ.

اكىمنىڭ ايتۋىنشا، «اتامەكەندەگىلەر» بۇل ەسكەرتۋدەن كەيىن دەرەۋ ءوز كەمشىلىكتەرىن مويىنداپ، زەرتتەۋدىڭ دۇرىس جۇرگىزىلمەگەنىن ايتىپتى.

«ماڭعىستاۋ وبلىسىنىڭ اكىمدىگى ۇلتتىق كاسىپكەرلەر پالاتاسىنان جاعدايدى رەتتەۋدىڭ جولدارىن سۇرادى. الايدا، «اتامەكەن» ۇ ك پ ەشقانداي ۇسىنىس بەرە المادى. پالاتا وكىلدەرىمەن كەزدەسۋ بارىسىندا «ەگەر زەرتتەۋ ناتيجەلەرى قاتە بولسا، كاسىبي تۇرعىدا جاسالماسا ەندەشە دۇرىس ەمەستىگىن مالىمدەڭىزدەر» دەپ ايتقان بولاتىنمىن. ولار دەرەۋ كەلىستى، زەرتتەۋ ناتيجەلەرىنىڭ كەم-كەتىگىن جوندەيتىنىن ايتىپ ماقالا جاريالادى، ءبىزدىڭ ءوڭىردى ماقتاپتى. بۇل ماقتاۋى جاعىمپازدىق دەپ تۇسىنبەڭىزدەر، راسىمەن دە ماڭعىستاۋ وبلىسى بيزنەس- سالادا الدىڭعى قاتاردا كەلەدى. رەيتينگ بولعان سوڭ ەلىمىزدەگى ءبىر وبلىس سوڭعى ورىندى الۋى ءتيىس، ءبىراق ءبىز بۇل زەرتتەۋ ناتيەجەلەرىنە توقتاپ قالماي، دامىتۋ جۇمىستارىن ودان ءارى جالعاستىرا بەرمەكپىز»، - دەدى اليك ايداربايەۆ.

دەمەك، «اتامەكەن» ۇ ك پ 2015-جىلعا ارنالعان زەرتتەۋدى جالعان جۇرگىزگەن. ەگەر اليك ايداربايەۆ جوبا ناتيجەلەرىنە كۇدىكپەن قاراپ، سىن ايتپاسا ول بەكىتىلىپ تە كەتەر ەدى. ال، زەرتتەۋ جۇمىستارىنا از اقشا جۇمسالمايتىنى ايدان انىق. ماسەلەن، 2014-جىلى وسى «ىسكەرلىك كليمات» جوباسى العاش قولعا الىنعان كەزدە قازاقستان پرەمەر-ءمينيسترى كارىم ءماسىموۆ وبلىس باسشىلارىنا اتالعان زەرتتەۋدى قارجىلاندىرۋدى تاپسىرعان بولاتىن.