ءۇش تىلدىلىكتى ەنگىزۋدىڭ نەگىزگى ءمانى قازاق تىلىندە بولىپ وتىر - ە. ساعاديەۆ

 استانا. قازاقپارات - مەكتەپتەردە ءۇش تىلدە ءبىلىم بەرۋ جۇيەسىن ەنگىزۋدىڭ نەگىزگى ءمانى قازاق تىلىندە بولىپ وتىر.

 بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر ءبىلىم جانە عىلىم ءمينيسترى ەرلان ساعاديەۆ وسىلاي ءمالىم ەتتى. 

 «قازىرگى كۇنى ورىس تىلىندەگى مەكتەپتەردە قازاق ءتىلى وقىتىلعانىمەن، ونى ءبىتىرىپ شىققان ورىس، قازاق جانە باسقا ۇلت وكىلدەرىنىڭ ەشقايسىسى دا قازاقشا سويلەپ كەتكەن جوق. بۇنى جاسىرۋدىڭ قاجەتى دە جوق. كوبىسى قازاق تىلىندە سويلەمەك تۇگىلى ونى تۇسىنبەيدى دە. سوندىقتان دا، ءبىز مىندەتتى باعدارلامالاردىڭ جوسپارىندا قازاقستان تاريحى مەن ادەبيەتى قازاق تىلىندە وتەتىن بولادى. بۇل قازاقستاننىڭ بارلىق مەكتەپتەرىندە دە وسىلاي جۇرەدى»، - دەدى ە. ساعاديەۆ.

وسىعان دەيىن حابارلاعانداي، مينيستر ەلىمىزدە ءۇش ءتىلدى ءبىلىم بەرۋگە كوشۋدە ەش كەدەرگى بولماۋى كەرەك دەپ سانايدى. «ءبىز 2019 - جىلعا دەيىن جوعارى سىنىپتاردى وسى جۇيەگە كوشىرەتىن بولامىز. ءبىر ايتا كەتەتىنى، مەكتەپتە جوعارى سىنىپتارعا تەحنيكالىق ماماندىقتار ءپانىن اعىلشىن تىلىندە وتكىزە وتىرىپ، وقۋشىنىڭ الەمدىك وقۋداعى ۇدەرىستەرگە ىقپالداسۋىنا جاعداي جاسايمىز. بۇنداي ىقپالداسۋ وقۋشى ءۇشىن مىندەتتى. وسىلايشا، ول جوعارى وقۋ ورىندارىندا دا اعىلشىن تىلىندە وقىتىلاتىن تەحنيكالىق پاندەرگە بەيىمدەلە باستايدى»، - دەگەن بولاتىن مينيستر ە. ساعاديەۆ.

اۆتور: قانات مامەتقازى ۇلى