ءۇش تىلدە ءبىلىم بەرۋدىڭ تيىمدىلىگى عىلىم ارقىلى دالەلدەنگەن - ە. ساعاديەۆ

 استانا. قازاقپارات - ءۇش تىلدە ءبىلىم بەرۋدىڭ تيىمدىلىگى عىلىم ارقىلى دا دالەلدەنگەن. ونى ەنگىزۋدىڭ بالالارعا ەش قيىندىعى جوق.

 بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر ءبىلىم جانە عىلىم ءمينيسترى ەرلان ساعاديەۆ وسىلاي ءمالىم ەتتى.

 ءمينيستردىڭ پايىمىنشا، بالالاردىڭ ءۇش تىلدە سويلەپ، ءبىلىم الۋىندا ەشقانداي دا قيىندىق جوق. «ەگەر جالپىلاما جۇرگىزىلگەن زەرتتەۋلەرگە سۇيەنسەك، ەكى جانە ودان دا كوپ تىلدە سويلەيتىن بالالاردا دامۋ دەڭگەيى ءبىرشاما جوعارى. بۇنى عالىمدار دا ميكروسكوپ ارقىلى دالەلدەگەن: جەتى جاستاعى ەكى تىلدە سويلەيتىن بالانىڭ ميىنداعى سينوپسيا بايلانىستارى ءبىر تىلدە عانا سويلەيتىن بالاعا قاراعاندا جوعارى. بۇل عىلىممەن دالەلدەنگەن. وسىعان بايلانىستى، بالا تۋعاننان باستاپ ەكى ءتىلدى ورتاعا تاپ بولسا، ونىڭ ميىنىڭ مۇمكىندىگى دە جوعارى بولادى. سوندىقتان دا، ءۇش ءتىلدى ءبىلىم بەرۋ جۇيەسىنە كوشۋدىڭ ەش قيىندىعى بولمايدى دەپ سانايمىز»، - دەدى ە. ساعاديەۆ.

وسىعان بايلانىستى، مينيستر ەلىمىزدە ءۇش ءتىلدى ءبىلىم بەرۋگە كوشۋدە ەش كەدەرگى بولماۋى كەرەك دەپ سانايدى. «ءبىز 2019 - جىلعا دەيىن جوعارى سىنىپتاردى وسى جۇيەگە كوشىرەتىن بولامىز. ءبىر ايتا كەتەتىنى، مەكتەپتە جوعارى سىنىپتارعا تەحنيكالىق ماماندىقتار ءپانىن اعىلشىن تىلىندە وتكىزە وتىرىپ، وقۋشىنىڭ الەمدىك وقۋداعى ۇدەرىستەرگە ىقپالداسۋىنا جاعداي جاسايمىز. بۇنداي ىقپالداسۋ وقۋشى ءۇشىن مىندەتتى. وسىلايشا، ول جوعارى وقۋ ورىندارىندا دا اعىلشىن تىلىندە وقىتىلاتىن تەحنيكالىق پاندەرگە بەيىمدەلە باستايدى»، - دەدى مينيستر ە. ساعاديەۆ.

اۆتور: قانات مامەتقازى ۇلى