رەسەيدە تەگىن ءبىلىم العىڭىز كەلەدى مە؟
دەگەنمەن، ءبارى ساتۋلى بۇگىنگى زاماندا وسىنداي قادامداردى بىلە جۇرگەن ارتىق بولماس، اسىرەسە ءبىلىم ىزدەگەن جاستارعا. ايتايىق دەگەنىمىز، رەسەي ىنتىماقتاستىعى رەسەيدىڭ ۋنيۆەرسيتەتتەرىندە شەتەلدىك ازاماتتارعا تەگىن وقۋعا اشىق قابىلداۋ جاريالاعانى تۋرالى ەدى.
رەسەي ۋنيۆەرسيتەتتەرى سوڭعى ءۇش جىلدا تەگىن وقۋعا 15 مىڭ شەتەلدىك ازاماتتى شاقىرىپتى. «ر ي ا نوۆوستي» اگەنتتىگىنىڭ حابارلاۋىنشا، بۇل پروتسەسكە 400 دەن استام رەسەيلىك ۋنيۆەرسيتەت قاتىستىرىلىپ وتىر.
ال، بيىل العاش رەت ەلەكتروندى نىساندا تاپسىرىستاردى اشىق قابىلداۋ ءراسىمى ىسكە قوسىلىپتى. ياعني، الەمدەگى 198 ەلدىڭ ازاماتتارى (يادرولىق فيزيكانى قوسا ساناعاندا مەديتسينالىقتان باستاپ تەحنيكالىققا دەيىن) ەڭ الۋان- ءتۇرلى ماماندىقتار بويىنشا رەسەيلىك ۋنيۆەرسيتەتتەردە وقۋعا وزدەرىنىڭ تاپسىرىستارىن جىبەرە الادى. ول ءۇشىن بار بولعانى www.russia.study پورتالىندا تىركەلۋ قاجەت.
رەسەي ىنتىماقتاستىعى باسشىسى ليۋبوۆ گلەبوۆانىڭ مالىمدەۋىنشە، ءراسىم شامامەن 20 مينۋتتى الادى، قاراپايىم ەكى قاداممەن ورىندالادى: شەتەلدىك ازامات ءوزىنىڭ جەكە باسىن كۋالاندىرادى، سوسىن ەلەكتروندى پوشتا اشادى. «راستاۋ ءبىر مەزەتتە كەلەدى. پوشتا الداعى ۋاقىتتا نيەتتى ابيتۋريەنتپەن تەز ءارى سەنىمدى بايلانىس ورناتۋعا كەرەك بولادى، ال ول وعان قانشالىقتى جەدەل جاۋاپ بەرۋى، ءوزىنىڭ وسى وقۋعا قانشالىقتى قىزىعۋشىلىعىنا تىكەلەي بايلانىستى بولادى. تەكسەرۋدەن سوڭ ۇمىتكەر ءۇشىن ساۋالناماعا رۇقسات اشىلادى، سوندا ول ءوزىنىڭ دەربەس دەرەكتەرىن جازادى، ءوز جەتىستىكتەرىن ءارى وقىعىسى كەلەتىن وقىتۋ باعىتىن تاڭداپ كورسەتەدى، سونداي-اق ءوز اتىنان دايەكتەمەلەنگەن حاتىن جازىپ جىبەرەدى. ساۋالناما بۇكىل ەل بويىنشا ساۋالنامالاردىڭ ورتاق تىزىمىنە كەلىپ تۇسەدى. سودان كەيىن قاي ەلدىڭ بولماسىن وپەراتورى (ءار ەلدە ءوزىنىڭ وپەراتورى بار) ۇمىتكەرلەرگە الدىن الا ىرىكتەۋ وتكىزەدى»، - دەيدى ل. گلەبوۆا اگەنتتىككە بەرگەن سۇحباتىندا.
بيىل ىرىكتەۋ ءراسىمى سۇحباتتاسۋ نەمەسە تەستىلەۋ تۇرىندە وتكىزىلمەك. ال، كەلەسى جىلدان باستاپ وليمپيادالار مەن تەستىلەردىڭ جۇيەلەرىنىڭ نەگىزىندە تولىق نىساندا باعالاۋ تۇرىنە كوشۋ جوسپارلانىپ وتىر. ءار ەل بويىنشا جەكەلەگەن رەيتينگ قالىپتاستىرىلاتىن بولادى. ىرىكتەۋدىڭ تاعى ءبىر ەلەمەنتى - رەسەيلىك ۋنيۆەرسيتەتتەر شەت ەلدەردە وتكىزىپ وتىراتىن وليمپيادالار بولماق. كۆوتانىڭ نەگىزىندە وقۋ ءۇشىن شەتەلدىك ازامات ىرىكتەۋدەن وتكەن سوڭ، ءوزى وقىعىسى كەلەتىن 6 وقۋ ورنىن تاڭدايدى دا، سولاردى ءوزى- اق سارالاپ شىعادى. سودان كەيىن ءاربىر ۋنيۆەرسيتەت ءوزىنىڭ «ەلەكتروندى كابينەتىن» اشادى دا قايسى ءبىر ۇمىتكەردىڭ پايداسىنا تاڭداۋ جاسايدى. ەگەر دە ول ءوزىنىڭ تاڭداعان وقۋ ورنىنا ىلىكپەسە، وعان ەكىنشى ءبىر وقۋ ورنى ۇسىنىلادى... وسىلايشا ابيتۋريەنت التىنشى ۋنيۆەرسيتەتكە دەيىن بارا الادى. ەگەر دە وسى التى وقۋ ورنىنىڭ بىردە- بىرەۋى ونى تاڭداماعان بولسا، رف ءبىلىم جانە عىلىم مينيسترلىگى باسقا ءبىر ۋنيۆەرسيتەتتە وقۋعا بالامالى ۇسىنىس بەرەدى ەكەن.
«رەيتينگ» گازەتى.
№15, 21 اقپان 2016 -جىل.
