اتاقتى جيھانكەز ماعجان ساعىمبايەۆ قازاقستاندى اتپەن ارالاپ شىقپاق نيەتتە

الماتى. قازاقپارات - الماتى مارافونى تەك الماتىلىقتار ءۇشىن عانا ەمەس، بۇكىل قازاقستاندىقتار ءۇشىن دە ايتۋلى سپورتتىق مەرەكە.

ول ادامدار اراسىندا دوستىقتىڭ، تانىستىقتىڭ نىعايۋىنا سەپتىگىن تيگىزەدى. كەشە الماتى مارافونىنا تۇڭعىش رەت قاتىسقان بەلگىلى جيھانكەز ماعجان ساعىمبايەۆ «قازاقپارات» تىلشىسىنە بەرگەن سۇحباتىندا وسىلاي دەدى.

 «مەن بۇگىن الماتى مارافونىنا تۇڭعىش رەت قاتىسىپ، 42 شاقىرىم 195 مەتر قاشىقتىقتى جۇگىرىپ ءوتتىم. ەڭ قيىن كەزەڭ 30-35 شاقىرىمنان كەيىن باستالادى ەكەن. ءارى قاراي، ءوزىڭدى قامشىلاپ، جىگەرىڭدى جانىپ جۇگىرمەسەڭ بولمايدى. مىنە، وسىنداي سىناقتار ادام بويىندا شىدامدىلىق، توزىمدىلىك قاسيەتتەردى قالىپتاستىرادى»، - دەدى م. ساعىمبايەۆ.

سونىمەن قاتار، ماعجان بولاشاقتا قازاقستان اۋماعىن اتپەن ارالاپ شىعۋدى ارماندايتىندىعىن جەتكىزدى.

«مەن كەزىندە دۇنيەجۇزىن ۆەلوسيپەدپەن ارالاپ شىعىپ ەدىم. تاياۋدا ماقسۇت جۇمايەۆ ەكەۋمىز وڭتۇستىك امەريكانىڭ ەڭ بيىك شىڭى - اكونكاگۋا شىڭىن باعىندىردىق. ەندى الداعى ۋاقىتتا قازاقستاننىڭ ءار وبلىسىن اتپەن ارالاپ شىققىم كەلەدى. اۋىل-ايماقتاردا بولىپ، جەرگىلىكتى تۇرعىنداردىڭ تۇرمىس-تىرشىلىگىمەن تانىسسام دەيمىن. باستى ماقساتىم - وسى ساياحات ارقىلى قازاق حالقىنىڭ ۇلتتىق سالت-ءداستۇرىن، مادەنيەتىن پاش ەتۋ، ءار ءوڭىردىڭ وزىندىك ەرەكشەلىكتەرىمەن، تاريحىمەن تانىسىپ، ولاردى ۇعىنىپ، جۇرتشىلىققا دۇرىس تۇسىندىرە ءبىلۋ»، - دەدى م. ساعىمبايەۆ.

اۆتور: ايبوتا جاپپاربەرگەن