ورالدا ءداستۇرلى قادىر وقۋلارى مارەگە جەتتى - فوتو
اتالمىش كىتاپحانا ديرەكتورىنىڭ ورىنباسارى سارا كەنجەبايەۆانىڭ ايتۋىنشا، جاستار اراسىندا قازاقتىڭ ۇلى اقىنى قادىر مىرزا ءاليدىڭ شىعارماشىلىعىن ناسيحاتتاۋ ماقساتىندا ۇيىمداستىرىلعان ءداستۇرلى بايقاۋعا وبلىس اۋداندارى مەن ورال قالاسىنداعى وقۋ ورىندارىنان 17-35 جاس ارالىعىنداعى 20 ۇمىتكەر قاتىسىپ، باق سىنادى.
سايىس قورىتىندىسىندا ءۇش اتالىم بويىنشا ۇزدىك ونەرىن كورسەتە بىلگەن ج. دوسمۇحامەدوۆ اتىنداعى پەداگوگيكالىق كوللەدج ستۋدەنتى سامات بايبولاتوۆ باس جۇلدەنى يەلەندى. سونىمەن قاتار جەكە اتالىمدار بويىنشا جەڭىمپاز- جۇلدەگەرلەر انىقتالدى. مىسالى، «جۇرەگىنە حالقىمنىڭ جول تابامىن» اتالىمى بويىنشا اقجايىق اۋدانىنان كەلگەن ءانۋار امانجولوۆتىڭ ولەڭى قازىلار القاسىنىڭ شەشىمى بويىنشا ۇزدىك دەپ تانىلدى.
سونداي- اق م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى اسلانبەك شىعىروۆ ەكىنشى، جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىنىڭ شاكىرتى نۇرجاۋعان ەسەن ءۇشىنشى ورىندى ەنشىلەدى. «بولۋ ءۇشىن جارالعان تۋعان جەردىڭ جىراۋى» اتالىمى بويىنشا قادىر جىرلارىن مانەرلەپ وقۋدان بوكەي ورداسى اۋدانىنان نازگۇل پاحمان، سىرىمدىق التىنگۇل عيبراتوۆا، قۇرمانعازى اتىنداعى مۋزىكا كوللەدجىنىڭ ستۋدەنتى اقىلبەك امانتاي جۇلدەلى ورىنداردى ءبولىستى.
«اقىننان قالعان اسىل ءسوز» اتالىمىندا قادىردىڭ قاناتتى سوزدەرى بويىنشا جارىسۋدان باتىس قازاقستان يندۋستريالدى كوللەدج شاكىرتى ساپارمۇرات تولەگەن ۇلى جەڭىمپاز اتانسا، زەلەنوۆ اۋدانىنان زارينا حاميەۆا ەكىنشى، ماڭعىستاۋ وبلىسىنان كەلگەن شىرىن بەسىنبايەۆا ءۇشىنشى ورىنعا كوتەرىلدى.
بايقاۋ جەڭىمپاز- جۇلدەگەرلەرى ديپلومدارمەن، سىيلىقتارمەن ماراپاتتالدى. قادىر وقۋلارى كەزىندە اقىن جىرلارى وقىلىپ، ارنايى كىتاپ كورمەسى ۇيىمداستىرىلىپ، بەينەفيلم كورسەتىلدى. قادىر مىرزا ءاليدىڭ سوزدەرىنە جازىلعان اندەر دە ورىندالدى.
