اقتوبەلىك بالالار قاريالارعا سىي- سىياپات جاسادى
بالالار جانە جاسوسپىرىمدەر شىعارماشىلىعى ءۇيىنىڭ تاربيلەنۋشىلەرى قارتتار مەن مۇگەدەكتەرگە ارنالعان ينتەرنات تۇرعىندارىنا كونتسەرت قويدى.
بۇل تۋرالى 24.kz حابارلايدى.
قامكوڭىل قاريالار بالالار ۇيىمداستىرعان قولونەر كورمەسىن دە تاماشالادى. وندا بالدىرعاندار سالعان سۋرەتتەر مەن قولدان جاسالعان ءتۇرلى بۇيىمدار قويىلدى. بالالار جانە جاسوسپىرىمدەر شىعارماشىلىعى ءۇيى 2010 -جىلدان بەرى كىشكەنتاي اقتوبەلىكتەرگە قىزمەت كورسەتىپ كەلەدى.
مۇندا بالالار بوس ۋاقىتىن ءتيىمدى وتكىزەتىن 40 تان استام ۇيىرمە بار. قايىرىمدىلىق شاراسىنا 600 بالا قاتىسىپ، ءوز ونەرلەرىن كورسەتتى. كونتسەرت سوڭىندا دەمەۋشىلەردىڭ كومەگىمەن قاريالارعا سىي- سىياپات جاسالدى.
«بۇل شارانىڭ نەگىزگى ماقساتى - جاستار مەن بالالاردىڭ بويىندا پاتريوتتىق تاربيەنى وياتۋ جانە ادامگەرشىلىك تاربيەگە باۋلۋ، ءبىر- بىرىنە دەگەن سۇيىسپەنشىلىككە باۋلۋ. سونىمەن قاتار بۇل كونتسەرت وسى بالالاردىڭ جىلۋىن، وزدەرىنە سىيلاعان شاتتىق سەزىمدەرىن سەزدىرۋ ماقساتىندا ۇيىمداستىرىلىپ وتىر»، - دەيدى بالالار جانە جاسوسپىرىمدەر شىعارماشىلىعى ءۇيى ديرەكتورىنىڭ ورىنباسارى دامەش بەكبەرگەنوۆا.
