قىتايداعى عيباداتحانالاردىڭ بىرىندە روبوت- موناح پايدا بولدى
ءدىني اندەر شىرقاپ، قاراپايىم تاقىرىپتاردا اڭگىمەلەسۋگە قاۋقارلى تەحنيكانىڭ الەۋمەتتىك جەلىلەردە جەكە پاراقشالارى دا بار. تۇرعىندار سول ارقىلى جەرگىلىكتى جاستاردى ءدىن جولىنا بەت بۇرۋعا ۇندەمەك. لۋنسيۋان قالاسىنداعى عيباداتحانا موناحتارىنىڭ ءبىرى - سيانەر ەسىمدى روبوت. بويى نەبارى 60 سانتيمەتر بولاتىن قۇلتەمىر بۋددا ءدىنى تاقىرىبىنداعى قاراپايىم سۇراقتارعا جاۋاپ بەرە الادى. ازىرگە بىلەتىنى 20 تىركەس پەن 7 ءتۇرلى قوزعالىس قانا. الايدا، قۇراستىرۋشىلار «تەمىر» بالانى ءالى دە جەتىلدىرىپ، ءبىلىمى جەتىك موناح ەتۋدەن ءۇمىتتى. تۇرعىندار قۇلتەمىر ايماقتا دانالىقتىڭ جايىلۋىنا ۇلكەن سەپ بولادى دەپ وتىر.
سيان فان، روبوت- موناحتى قۇراستىرۋشى:
- سيانەر عىلىم مەن بۋددانىڭ ۇندەستىگىن ايقىن كورسەتتى. بۇل كاسىپكەرلىك نەمەسە اقشا تابۋ ماقساتىندا جاسالعان جۇمىس ەمەس. بۋددا ءدىنىن تاراتىپ، ونى ناسيحاتتاۋعا تىڭ تەحنولوگيالاردى پايدالانعىمىز كەلدى.
عيباداتحانا قىزمەتكەرلەرىنىڭ ايتۋىنشا، روبوت- موناحقا قىزىعۋشىلار وتە كوپ. ءتىپتى، كەيبىرى اقىسىن تولەپ ساتىپ الۋعا دا نيەتتى. وعان قوسا، قۇلتەمىر الەۋمەتتىك جەلىلەرگە قوسىلىپ، جەرگىلىكتى جاستاردى عيباداتحانا ەسىگىنەن باس سۇعىپ، قۇدايعا قۇلشىلىق ەتۋگە ۇندەيدى.
ميشەل يۋ، قىتاي تۇرعىنى:
- ءوزى سونداي سۇيكىمدى. بۋددا ءدىنىن ناسيحاتتاۋعا روبوت- موناحتىڭ قوسار ۇلەسى مول دەپ ويلايمىن. كوپشىلىگى روبوتقا قىزىعىپ، كەيىن ءدىن تۋرالى دا ۇعىنىپ جاتىر. عيباداتحاناعا قويىلعانعا دەيىن بۇل قۇلتەمىر قىتايداعى بىرنەشە تەحنولوگيالىق كورمەدە تانىستىرىلعان. ءبىراق قۇراستىرۋشىلارى ءوز تۋىندىسىن حالىقتى جاقسىلىققا جەتەلەيتىن يگى ىسكە پايدالانعاندى ءجون ساناپتى.
www.24.kz
