الماتى حالقى العاش رەت ۇلتتىق كيىمدەر مەرەكەسىن تويلادى - فوتورەپورتاج
بۇگىن اتالعان مەرەكەگە قالا جۇرتى اتسالىسىپ، اربات الاڭىندا باس قوستى. مەرەكە بارىسىندا ءتۇرلى كورمە مەن ويىن ۇيىمداستىرىلىپ، كونتسەرت وتكىزىلدى.
بۇل تۋرالى Stan.kz سايتى حابارلايدى.
ءساۋىردىڭ 23-24 كۇندەرى ۇيىمداستىرىلعان شارا 2016 -جىلدىڭ 29 ساۋىرىندە وتەتىن قازاق ۇلتتىق كيىمىنىڭ مەرەكەسىنە ارنالادى. اتالعان مەرەكە ەلىمىزدىڭ بارلىق ايماعىندا اتاپ وتىلمەك.
الماتى قولونەر پالاتاسى مەن IRIS اگەنتتىكتەرى بىرىگىپ، مەرەكەنىڭ كولەمدى وتۋىنە قولداۋ بىلدىرمەك نيەتتە. مۇنىمەن قاتار، الدىن الا ۇيىمداستىرىلعان شاراعا الماتى قالاسى المالى اۋدانى اكىمشىلىگى قولداۋ كورسەتتى. ۇلتتىق كيىمدەر مەرەكەسى قازاقستان رەسپۋبليكاسى تاۋەلسىزدىگىنىڭ 25 -جىلدىعى مەن الماتى قالاسىنىڭ 1000 جىلدىعىنا ارنالادى.
اربات الاڭىندا كاسىبي سانگەرلەر Fashion-شوۋ ۇيىمداستىرىپ، تانىمال قازاقستاندىق ارتىستەر ساحنادا ونەر كورسەتتى. مۇنىمەن قاتار، زەرگەرلەر وزدەرىنىڭ ءتۇرلى بۇيىمىن تانىستىرىپ، سۋرەتشىلەر الدىنا كەلگەن جاننىڭ بەينەسىن اينىتپاي سالىپ، تاڭداي قاقتىردى.
كونسەرتتىك باعدارلامادا يرينا كيشكينا، ەرالحان ابىشەۆ، قۋات باعىسبەكوۆ، اسەم، ەرلان ءسابيت، مادي گارين، ۆەنەرا ورازبەكوۆا، تۇرعىن ءالي داۋت سىندى جۇلدىزدار ونەر كورسەتتى.
Fashion-شوۋ بارىسىندا تىڭ تۋىندىلارىمەن قۋانتىپ جۇرگەن «سىمبات» اكادەمياسىنىڭ سانگەرى بالنۇر اسانوۆا ءوز توپتاماسىن تانىستىردى.
«مۇنداي شارانىڭ ۇيىمداستىرىلىپ، ۇلتتىق ناقىشتاعى كيىمدەرىمىز بەن اشەكەي بۇيىمدارىمىزدىڭ ناسيحاتتالىپ جاتقانىنا شەكسىز قۋانىشتىمىز. سوڭعى كەزدە ءتول مادەنيەتىمىز جاڭعىرىپ، جاس بويجەتكەندەر مەن جىگىتتەرىمىز ءوزىنىڭ پاتريوتتىعىن ايقىندايتىن كيىمدەردى تاڭداۋعا كىرىسكەن- ءدى. مۇنىمەن قاتار، كوپتەگەن بويجەتكەن قازاقى ويۋلارى بار كۇمىس اشەكەي- بۇيىم تاعىپ ءجۇر. اربات الاڭىنا كەلىپ، قۋانىشىمەن ءبولىسىپ جاتقان بارشا الماتىلىقتارعا شەكسىز العىسىمدى بىلدىرگىم كەلەدى. وسى مەرەكەنى جىل سايىن اتاپ وتسەك دەگەن تىلەگىم بار. ويتكەنى بۇل كۇنى قالا جۇرتى عانا كوڭىل كوتەرىپ قويماي، سانگەرلەر مەن زەرگەرلەر، سۋرەتشىلەر ءوز ونەرىن پاش ەتىپ، تابىس تاۋىپ جاتىر»، - دەيدى الماتى قالاسى تۇرعىنى گۇلي ءابدىرامانوۆا.
2016 -جىلدىڭ 24 -ساۋىرىندە اربات الاڭىندا مەرەكە ءوز جالعاسىن تابادى. قولونەر بۇيىمدارى كورمەسى ءوتىپ، №6 بي مەكتەبىنىڭ وقۋشىلارى «جاس قانات» توبى ونەر كورسەتەدى. ۇلتتىق ءداستۇردى ناسيحاتتايتىن «ارمان» تەاترىنىڭ ۇيىمداستىرۋىمەن «قىز ۇزاتۋ»، «بەتاشار» كىشىگىرىم سپەكتاكلدەرى قويىلادى. اتالعان تەاترعا ءمۇسلىم جۇماعالييەۆ جەتەكشىلىك ەتەدى.
قويىلىمنان كەيىن «ازيا» كيىم سالونى ۇيىمداستىرعان ءساندى كيىمدەر كورسەتىلىمى وتەدى. مۇنىمەن قاتار، قوناقتار «كاراۆان» مەملەكەتتىك قۋىرشاقتار تەاترىنىڭ ونەرىن تاماشالاي الادى. شارا سوڭىندا ۇلتتىق ويىندار ويناتىلىپ، كوزگە تۇسكەن قوناقتارعا سەرتيفيكاتتار بەرىلەدى.
