قايرات نۇرتاس پەن ولگا رىپاكوۆا الماتى مارافونىنا قاتىساتىن بولدى

الماتى. قازاقپارات - الماتى مارافونىندا «جۇلدىزدى كوماندا» جۇگىرەتىن بولدى.

بۇگىن وتەتىن قايىرىمدىلىق شاراسىنا «تۇران» اۋىز سۋى برەندىنىڭ ارنايى كومانداسى جاساقتالدى. ونىڭ قۇرامىندا نۇرتاس ادامباي، قايرات نۇرتاس، ايا شالقار، جاننا يليچيەۆا، ولگا رىپاكوۆا بار.

كوماندا ەرتەڭ «ەكيدەن» قاشىقتىعىن ەستافەتا ارقىلى باعىندىراتىن بولدى. سورە سىزىعىنان ءبىرىنشى بولىپ ءانشى قايرات نۇرتاس اتانادى.

«مەنى بۇل جوباعا شاقىرعاندا بىردەن كەلىستىم. سالاۋاتتى ءومىر سالتىن جاستارعا ناسيحاتتاۋعا ءبىر ىقپالىمدى تيگىزسەم، مەن ءۇشىن ۇلكەن قۋانىش»، - دەدى قايرات نۇرتاس.

ءانشى كۇندەلىكتى جۇگىرمەيتىنىن مويىندادى. الايدا ونەر ادامىنىڭ كۇندەلىكتى قيمىل-قوزعالىسى ۇلكەن فيزيكالىق دايىندىقتى قاجەت ەتەدى.

«مەنىڭ ءار ساحناعا شىققانىم فيتنەس. مەن 5 شاقىرىم قاشىقتىقتى وڭاي باعىندىرامىن دەپ ويلايمىن»، - دەدى ول.

بەلگىلى بلوگەر جاننا يليچيەۆا بۇل مارافونعا فيزيولوگيالىق دايىندىقتان كورى، مورالدى تۇرعىدان دايىندالىپ كەلگەنىن ايتتى.

«مەن سپورتپەن ونشا دوس ەمەسپىن. ءبىراق، بىزگە قاراپ جاستار وسەدى. شامامىز كەلگەنشە جۇگىرۋىمىز كەرەك»، - دەدى ول.

شوۋمەن نۇرتاس ادامباي بولسا، 2008-جىلى ولگا رىپاكوۆانىڭ سىنعا تۇسەر كەزىندە وزىنە بەرگەن سەرتىن ورىنداۋعا تىرىسىپ جاتقانىن ايتتى.

«ولگا شىعاتىن كەزدە، ەگەر التىن السا، مەن سپورتقا كەتەمىن دەپ ۋادە بەرىپ ەم. سونى ورىنداي الماي كەلەم. ەندى ەرتەڭ سوعان ءسال دە بولسا جاقىندايتىن ءسات تۋىپ تۇر»، - دەدى ول.

وليمپيادا چەمپيونى ولگا رىپاكوۆا بولسا، مارافون كەزىندەگى ەڭ باستى قاۋىپسىزدىك شاراسى جۇرتتىڭ الدىندا جۇگىرۋ ەكەنىن ايتتى.

«سوندا ەشكىم سەنى تاپتاپ كەتپەيدى (كۇلىپ). ۇلت ساۋلىعى ءار قوعام مۇشەسىنىڭ جەكە دەنساۋلىعىنان قالىپتاسادى. كەم دەگەندە ادامنىڭ ساۋلىعىنىڭ 50 پايىزى ءوزىنىڭ ءومىر سالتىنا بايلانىستى. 20 پايىزى قورشاعان ورتانىڭ اسەرىنەن بولادى. گەنەتيكالىق بەيىمدىلىكتىڭ دە ىقپالى 18 پايىز. 8-10 پايىزى دەنساۋلىق ساقتاۋ جۇيەسىنىڭ ۇلەسىندە. قاراپ وتىرساڭىز، ءوز دەنساۋلىعىڭىز ءوز قولىڭىزدا»، - دەدى ول.

اۆتور: گۇلميرا عوسمانالي