قازاقستان كليمات جونىندەگى پاريج كەلىسىمىنە قول قويا المادى

استانا. قازاقپارات - قازاقستان تەحنيكالىق سەبەپتەرگە بايلانىستى كليماتتىڭ وزگەرۋىمەن كۇرەس جونىندەگى پاريج كەلىسىمىنە قول قويا المادى.

بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى انۋار جايناقوۆ ءمالىم ەتتى.

«قازاقستان بۇل قۇجاتقا قول قويعان جوق. ويتكەنى، مەملەكەتىشىلىك پروتسەدۋرا جۇرگىزىپ ۇلگەرمەدى. ءبىزدىڭ ب ۇ ۇ- داعى تۇراقتى وكىلىمىز قايرات ءابدىراحمانوۆ بۇل قۇجاتتى قولداپ مالىمدەمە جاساپ، وعان ەلىمىزدىڭ تاياۋ ارادا قول قوياتىندىعىن ايتتى. تەحنيكالىق سەبەپتەرگە بايلانىستى قول قويىلمادى. بۇعان قوسا، قازاقستاننىڭ پاريج كەلىسىمىنىڭ تەز ارادا كۇشىنە ەنۋىن جاقتايتىن ەلدەر توبىنا قوسىلعانىن اتاپ وتكەن ءجون»، - دەدى ا. جايناقوۆ.

ەستەرىڭىزگە سالا كەتەيىك، پاريج كەلىسىمىنە قول قويۋدىڭ سالتاناتتى شاراسى 22 ءساۋىر كۇنى ب ۇ ۇ باس اسسامبلەياسى زالىندا ءوتتى. بۇل داتانى تاڭداپ الۋ دا تەگىن ەمەس. ويتكەنى، ءدال سول كۇنى عالامشار تۇرعىندارى جەر كۇنىن اتاپ وتكەن بولاتىن. قۇجاتقا الەمنىڭ 175 ەلى قول قويدى. قۇجات جاھاندىق پارنيكتى گازدار شىعارىندىلارى جالپى كولەمىنىڭ كەمىندە 55 پايىزى تيەسىلى 55 ەل راتيفيكاتسيالاعاننان كەيىن كۇشىنە ەنەدى.

ايتا كەتەرلىگى، قابىلدانعان جاھاندىق قۇجاتتا 2020-جىلدان باستاپ الەمدىك ءىس-قيمىلدىڭ نەگىزگى ۇستانىمدارى مەن ءپىشىنى عانا بەكىتىلگەن. سوندىقتان دا الداعى بىرنەشە جىل ىشىندە كەلىسىمنىڭ ورىندالۋ ەرەجەلەرىن ازىرلەۋ مىندەتى تۇر. كيوتو حاتتاماسىنا قاراعاندا جاڭا كەلىسىمدە دامۋشى ەلدەردىڭ پارنيكتى گازداردىڭ شىعارىندىلارىن قىسقارتۋ ىسىنە بەلسەنە اراسۋى كوزدەلەدى. اتالعان ماقساتتارعا وراي قۇجاتتا مۇنداي ەلدەرگە 2020-جىلدان باستاپ جىل سايىن 10 ميلليارد. ش. ب. كولەمىندە قارجىلاي كومەك ءبولۋ قاراستىرىلعان.

اۆتور: مارلان جيەمباي