شەتتەگى تاعى ءبىر قازاق ازاماتى وليمپياداعا جولداما الدى

استانا. قازاقپارات - موڭعوليا ەلىنىڭ استاناسى ۇلانباتىردا كۇرەس تۇرلەرىنەن وليمپيادا جولداماسىن تاراتاتىن حالىقارالىق تۋرنير باستالدى.

جارىستىڭ ءبىرىنشى كۇنى بوز كىلەمگە گرەك-ريم كۇرەسىنىڭ شەبەرلەرى شىقتى.

قازاقستان قۇراماسى ساپىندا ۇلانباتىرعا 6 بالۋان اتتانعان بولاتىن. ولاردىڭ ۇشەۋى جارىس جولىنا شىققان ەدى. الايدا وتانداستارىمىز جۇلدەلى ورىننان كورىنە المادى.

66 كەلىدە مەيرامبەك ايناقۇلوۆ ءبىرىنشى اينالىمدا ءۇندىستاندىق راۆيندەر سينحتان جەڭىلسە، 98 كەلىدە ەرۇلان ىسقاقوۆ تا ازەربايجاندىق ورحان نۋريەۆكە ەسە جىبەردى. 85 كەلىدە اسحات دىنمۇحامەدوۆ ەستون ەريك ەپستى 4:2 ەسەبىمەن جەڭگەنىمەن، ەكىنشى اينالىمدا جاپون تايشي وكادان 0:2 ەسەبىمەن جەڭىلدى.

وزبەكستان قۇراماسى قۇرامىندا بەلدەسەتىن قازاق ەرمۇرات تاسمۇراتوۆ 59 كەلىگە دەيىنگى سالماقتا وليمپيادا جولداماسىن يەلەندى. ول لوندون وليمپياداسىنا دا قاتىسقان بولاتىن.

ايتا كەتەيىك، ەرمۇرات كۇرەس الىپپەسىن شىمكەنت قالاسىنداعى ب. ساتتارحانوۆ اتىنداعى مەكتەپ-ينتەرناتتا ۇيرەنگەن.

ەستەرىڭىزدە بولسا، وسىدان ءبىراز ۋاقىت بۇرىن استانادا وتكەن ازيالىق ايماقتىق وليمپيادا ويىندارىنا ىرىكتەۋ جارىسىندا قىتايدا تۇراتىن قانداسىمىز ەرلانبەك كاتەي ۇلى قىتاي اتىنان وليمپيادا جولداماسىن جەڭىپ العان بولاتىن.

كۇنسۇلتان وتارباي