حالىق ءارتىسى ليتسەي وقۋشىلارىمەن كەزدەستى - فوتو
جاقىندا عانا قازاقستان رەسپۋبليكاسىنىڭ حالىق ءارتىسى، بۇكىل قازاق ەلىنە تانىمال اكتەر، 33 تەن استام فيلمدە ويناعان تۇڭعىشباي جامانقۇلوۆپەن (ءال- تارازي) قىزىقتى كەلەسى كەزدەسۋ ءوتتى، دەپ حابارلادى ليتسەيدەن كەشتى ۇيىمداستىرۋشىلار.
قاراپايىمدىلىعىمەن، قازاقتىڭ قانىنا سىڭگەن اشىقتىعىمەن بىردەن بالالاردىڭ كوڭىلىن جاۋلاپ العان تاۋ تۇلعالى تۇڭعىشباي اعا: «ءبىزدىڭ تىلدە مۇنداي كەزدەسۋلەردى «شەبەرلىك ساباقتارى» دەيدى. مەنەن وزدەرىڭدى قىزىقتىرىپ جۇرگەن سۇراقتاردى سۇراڭدار، تالقىلايىق، اڭگىمەلەسەيىك. قىسىلماڭدار، مەنىڭ دە سەندەر سياقتى بالالارىم بار، شاكىرتتەرىم جەتەرلىك. ءومىر ءسۇرىپ جاتقان جەرىم - قازاق ەلى، قىزمەتىم - قازاقتىڭ ونەرى»، - دەپ اعىنان جارىلدى.
جاستاردىڭ بولاشاعىنا الاڭداۋشىلىعىن جاسىرماي: «قازىر تازا ونەر مەن بازار ونەر ارالاسىپ كەتتى. جارقىلداعان تۇستەر مەن تارسىلداعان اۋەن سانانى الداۋدا. سەندەردىڭ دە كەيدە نەنىڭ جاقسى، نەنىڭ جامان ەكەنىن اجىراتۋدا شامالارىڭ كەلمەي قالادى. ءبىر مىسال ايتايىن، تويدىڭ باسىنان اياعىنا دەيىن ءبىر تولاستاماي شىرقالاتىن «ماريا ماگدالەنا چيپ- چيپ- چيپ» دەگەن ءان بار. ال، ول نە ءسوز، نەندەي ماعىنا؟ ءبىزدىڭ قازاققا تىپتەن جات ۇعىم، بىلە بىلسەڭدەر. كەزىندە «ماگدالەنا» دەگەن وپاسىزدىق جاساعان ايەل بولعان، سوندىقتان دا ونى «گرەشنايا ماگدالەنا» دەپ تە اتاعان. ال ەندى ءبىز كەلەمىز دە ونى انگە قوسىپ، قۇلاقتارىمىزعا ءسىڭىرىپ جاتىرمىز. وسىدان قانداي تاربيە، قانداي ونەگە الۋعا بولادى؟! ودان قالا بەردى، چيپ- چيپ- چيپ دەپ تاۋىقتاردى شاقىرىپ جاتىر ما؟» - دەپ ونەردىڭ بيىگىن الاسارتىپ جۇرگەن جاندارعا دەگەن رەنىشىن جاسىرمادى تۇڭعىشباي قادىر ۇلى.
وقۋشىلاردىڭ قويعان سۇراقتارىنا تۇشىمدى جاۋاپ بەرگەن تۇڭعىشباي اعا ءادىلباي تالقامبايەۆتىڭ قازاقتىڭ قارا دومبىراسىمەن ءان سالىپ بەرسەڭىز دەگەن ءوتىنىشىن دە جەرگە تاستامادى. ويلى سوزدەرى بار تەرمەنى تەبىرەنە شىرقاپ، قوشەمەتكە بولەندى.
تاعىلىمى مول، ونەگەلى كەزدەسۋدىڭ سوڭى قادىرلى قوناققا شاپان جابۋعا ۇلاستى. ليتسەي وقۋشىلارى ەسىمى ەلگە تانىمال اعالارىمەن ەستەلىك سۋرەتكە ءتۇسىپ، قولتاڭباسىن الدى.
