08:40, 24 - ءساۋىر 2016 | GMT +5
قازاقستاندىق ۆەلوسيپەدشى ەكى اياقتى كولىگىمەن تورتكۇل دۇنيەنى شارلاپ شىقپاقشى
الماتى. قازاقپارات - قازاقستاندىق ۆەلوسيپەدشى تالعات جۇمابەكوۆ 7 مىڭ شاقىرىمدىق ۆەلوساياحاتىنان ورالدى.
سپورتشى ساپار بارىسىندا باسىنان وتكەن قيىندىقتار مەن قىزىقتار تۋرالى قازاقپارات تىلشىسىنە ايتىپ بەردى.
«قازاقستان قالالارىنان بولەك رەسەي، داعىستان، گرۋزيا، تۇركيا تاعى باسقا 7 مەملەكەتتىڭ تەرريتورياسىنان ءوتتىم. جول بويى بولاشاقتا قاجەت بولاتىن دەرەكتى فيلمگە ۆيدەوماتەريال جينادىم. كايردەن مەككەگە بارام دەپ ەم، وعان ۆيزا بەرىلمەگەن سوڭ ول جوسپارىم ورىندالمادى»، - دەدى ت. جۇمابەكوۆ.
قارا جولدا ساياحاتشى پالاتكادا ۇيىقتاۋعا ءماجبۇر بولعان. كەيدە مەيىربان ادامدار ۇيىنە دە قوندىرعان.
بيىل ۆەلوشاباندوز قازاقستان تاۋەلسىزدىگىنىڭ 25 جىلدىعىنا وراي تورتكۇل دۇنيەنى ارالاپ شىقپاق. ول ءوزىنىڭ جاڭا ساپارىندا مۇسىلمانداردىڭ قاسيەتتى جەرلەرىن ءوز كوزىمەن كورۋدى جوسپارلاپ وتىر.
اۆتور: گۇلميرا عوسمانالي
