كوكشەتاۋدا اۋىل شارۋاشىلىعى تەحنيكالارىنىڭ كورمەسى ءوتتى - فوتو

كوكشەتاۋ. قازاقپارات - كوكشەتاۋدا «كوكشەتاۋ» مادەنيەت سارايىنىڭ الدىندا اۋىل شارۋاشىلىعى تاۋارلارىن وندىرۋشىلەردىڭ اگروونەركاسىپتىك كەڭەسىنە وراي ءتۇرلى اۋىلشارۋاشىلىق تەحنيكالارىنىڭ كورمەسى ءوتتى.

كورمەنى وبلىس اكىمى سەرگەي كۋلاگين ارالاپ كورىپ، تەحنيكا تۇرلەرىمەن تانىستى.

كورمەدە قازىرگى زامانعى ونىمدىلىگى جوعارى اۋىل شارۋاشىلىعى تەحنيكالارىنىڭ بىرنەشە ءتۇرىن كورۋگە بولادى. اسىرەسە، ونىمدىلىگى جوعارى قازىرگى زامانعى «دجون دير»، «كەيس»، «ۆەكتور»، «ەسىل» كومبايندارى، ەگىستىك كەشەندەر جانە تراكتورلار مەن «كاماز» جۇك كولىگى ءتارىزدى ديقان قاۋىمى ءۇشىن قاجەتتى تەحنيكالارى اۋىل شارۋاشىلىعى تاۋارلارىن وندىرۋشىلەردى قىزىقتىردى.

ال، عيماراتتىڭ ىشىنە قويىلعان جابدىقتار دا كوزدىڭ جاۋىن الادى. بۇل جەردە گەربيتسيدتەر، تۇقىمدار مەن جابدىقتاردى ساتاتىن كاسىپورىنداردىڭ ونىمدەرى قويىلعان. جەرگىلىكتى ءىرى وندىرۋشىلەردىڭ اراسىندا «ۆەكتور» كومباين زاۋىتى» جانە «كايك» سەرىكتەستىكتەرى مەن «كاماز» ا ق- نىڭ ونىمدەرى بار.

وبلىستىق اۋىل شارۋاشىلىعى باسقارماسى ءبولىمىنىڭ باسشىسى ماكسيم گوسانوۆتىڭ ايتۋىنشا، كورمە اۋىل شارۋاشىلىعى تاۋار وندىرۋشىلەرىن تەحنيكا جەتىستىكتەرىمەن، وسىمدىكتى قورعاۋ قۇرالدارىمەن جەتە تانىستىرۋ ماقساتىندا ءوتىپ وتىر. سونىمەن قاتار، ۇيىمداستىرۋشىلار كورمەدە ءتيىمدى كەلىسىم شارتتار جاسالادى دەگەن سەنىمدە.

       

 اۆتور: اسلان وسپانوۆ