قازاقستاندا جۇمىسقا ورنالاسۋدا ايەلدەر دە ەرلەرمەن تەڭ قۇقىلى - ت. دۇيسەنوۆا

استانا. قازاقپارات - قازاقستاندا جۇمىسقا تۇرۋدا ايەلدەر قۇقىقتارىن جۇزەگە اسىرۋ ءۇشىن قاجەتتى قۇقىقتىق جاعدايلار جاسالعان.

بۇل تۋرالى بۇگىن ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.

«ەلىمىزدە جۇمىسقا تۇرۋدا ايەلدەر قۇقىقتارىن جۇزەگە اسىرۋ ءۇشىن قاجەتتى قۇقىقتىق جاعدايلار جاسالعان. اتاپ ايتقاندا، جۇمىسقا ورنالاسۋدا ايەلدەر دە ەرلەرمەن تەڭ قۇقىلى، سونداي-اق ەكونوميكانىڭ بارلىق سالالارىنا بەلسەندى قاتىسۋدا»، - دەدى مينيستر.

قازاقستان رەسپۋبليكاسىندا 2006-2016-جىلدارعا ارنالعان گەندەرلىك تەڭدىك ستراتەگياسىن ىسكە اسىرۋدىڭ الدىن الا قورىتىندىلارىنا ارنالعان حالىقارالىق كونفەرەنتسيادا.

ت. دۇيسەنوۆا ەرلەر مەن ايەلدەر اراسىنداعى جالاقى بويىنشا ايىرماشىلىق ولار جۇمىس ىستەپ جاتقان سالالاردىڭ ەرەكشەلىگىنە بايلانىستى ەكەنىن جەتكىزدى. مىسالى، ءبىلىم بەرۋ مەن دەنساۋلىق ساقتاۋ سالالارىنداعى قىزمەتكەرلەردىڭ 70 پايىزى ايەلدەر بولسا، ال تاۋ-كەن سالاسىندا 70 پايىزى ەرلەر. سايكەسىنشە، جۇمىستىڭ ەرەكشەلىگى مەن جاعدايى ەڭبەكتى تولەۋدى سارالايدى.

سونىمەن قاتار، ۆەدومستۆو باسشىسى جاڭا ق ر ەڭبەك كودەكسى سالادا گەندەرلىك تەڭدىكتى قامتاماسىز ەتۋگە نەگىزدەلگەن نورمالاردىڭ كەشەنىن قامتىپ وتىرعاندىعىن ءسوز ەتتى. بۇل تۇرعىدا ايەلدىڭ، جۇكتى ايەلدەردىڭ جانە بالالى نازىك جاندىلاردىڭ ەڭبەگىن رەتتەۋدىڭ ەرەكشەلىكتەرى بەكىتىلگەن.

اۆتور: رۋسلان عابباسوۆ