ە. ىدىرىسوۆ قازاقستاندىقتاردىڭ قىرىمعا بارىپ دەمالۋىنا قاتىستى ويىن ءبىلدىردى
«ۋكراينانىڭ ەلشىلىگى مەن رەسەيدىڭ ەلشىلىگى قىرىمداعى جازعى دەمالىس ماۋسىمىنا قاتىستى، ءبىزدىڭ ەلدىڭ تۋريستەرىنە قاتىستى پىكىرلەرىن ايتىپ جۇرگەنىن مەن بىلەمىن. ولاردىڭ پىكىر الماسقانىن كورىپ وتىرمىز.
بۇل جەردە ءبىزدىڭ قوعام ابدىراپ قالدى: نە ىستەۋ كەرەك؟ ءبىر جاعىنان، رەسەي تاراپى تۋريستەر ءۇشىن بار جاعداي جاسايمىز دەپ ۋادە بەرىپ وتىر. ەكىنشى جاعىنان، ۋكراينا تارابى ءوز اۋماعىنا كىرۋگە قاتىستى ءوز كوزقاراسىن ايتىپ ءجۇر. وسىلايشا، ءبىزدىڭ ەلدىڭ اۋماعى اقپاراتتىق جارىستىڭ الاڭىنا اينالىپ وتىر. بۇنداي جاعدايدا تۋريستەرگە قانداي دا ءبىر كەڭەس ايتۋ قيىن. تەك ايتارىم، قىرىمنىڭ ماسەلەسى وتە قيىن حالىقارالىق ماسەلە، سوندىقتان، بۇل ماسەلەنىڭ شەشىمى حالىقارالىق قۇقىق نەگىزىندە شەشىلۋ كەرەك. ياعني، بۇل ماسەلەنى شەشەتىن قازاقستان ەمەس. بۇل شيەلەنىسكەن جاعدايدى شەشەتىن باسقا پلاتفورمالار بار»، - دەپ اتاپ ءوتتى ە. ىدىرىسوۆ.
قازاقستاننىڭ سىرتقى ىستەر ءمينيسترى ءوز ويىن جالعاستىرا كەلە قىرىمعا قاتىستى رەسەيدىڭ دە، ۋكراينانىڭ دا باسشىلىعى قانداي پىكىر ۇستانىپ وتىرعانى بەلگىلى ەكەنىن اتاپ ءوتتى.
«سوندىقتان، بۇل ەكى ەل حالىقارالىق دەڭگەيدە جاعدايدى رەتتەۋ كەرەك. ال، قازاقستاندىقتاردىڭ قىرىمعا بارىپ دەمالۋىنا قاتىستى ايتار بولسام، ءار ازامات ءوزى جەكە شەشىم قابىلداۋ كەرەك. ءاربىر قازاقستاندىق بىزگە دوس وسى ەكى ەلدىڭ جاعدايىن ابدەن زەردەلەپ، باسقا دەمالىس ورىندارىن تاڭداسا دا بولار ەدى. ال، ەگەر دە ناقتى قىرىمدى تاڭداسا، بارىپ- كەلەر مارشرۋتىن ەرتە جانە ناقتى انىقتاپ الۋ كەرەك»، - دەدى ە. ىدىرىسوۆ.
اۆتور: كەنجەكەي توقتامۇرات قىزى
