قازاقستاندا جوعارعى مەديتسينالىق كوللەدجدەر قۇرىلماق
دەپ حابارلايدى ق ر دەنساۋلىق ساقتاۋ جانە الەۋمەتتىك دامۋ مينيسترلىگى.
«دەنساۋلىق ساقتاۋ جانە الەۋمەتتىك دامۋ مينيسترلىگى «مەيىرگەرلىك ءىس» ماماندىعى بويىنشا قولدانبالى باكالاۆرياتتى ەنگىزۋ بويىنشا جوبانى جۇزەگە اسىرۋدى 2014 - جىلى ەكسپەريمەنتالدى تارتىپتە 6 مەملەكەتتىك مەديتسينالىق كوللەدج بازاسىندا: استانا قالاسىنىڭ مەديتسينالىق كوللەدجى، كوكشەتاۋ مەديتسينالىق كوللەدجى، قىزىلوردا مەديتسينالىق كوللەدجى، پاۆلودار مەديتسينالىق كوللەدجى، رەسپۋبليكالىق ورتا مەديتسينالىق جانە فارماتسيەۆتيكا قىزمەتكەرلەرىن دايىنداۋ مەن قايتا دايارلاۋ كوللەدجى، باتىس قازاقستان مەديتسينالىق كوللەدجى باستادى»، - دەلىنگەن ۆەدومستۆو حابارلاماسىندا.
اتالعان وقۋ ورىندارىندا فين ساراپشىلارىنىڭ قاتىسۋىمەن ازىرلەنگەن «مەيىرگەرلىك ءىس» ماماندىعى بويىنشا قولدانبالى باكالاۆريات باعدارلاماسى ەنگىزىلمەك.
ق ر دەنساۋلىق ساقتاۋ سالاسىن دامىتۋدىڭ 2016-2019 ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋ اياسىندا ق ر د س ا د م ماماندارى JAMK جانە Lahti (فينليانديا) قولدانبالى عىلىمدار ۋنيۆەرسيتەتتەرىنىڭ ارىپتەستەرىمەن بىرلەسە وتىرىپ، ق ر- داعى مەيىرگەرلىك ءبىلىم بەرۋ جۇيەسىن جەتىلدىرۋدىڭ 2016-2019 -جىلدارعا ارنالعان جول كارتاسىن جاسادى.
قولدانبالى باكالاۆريات باعدارلاماسى ەۋروپالىق ديرەكتيۆالارعا ساي دۋالدى ءبىلىم بەرۋ قاعيدالارىن قاراستىرادى. ونىڭ ىشىندە وقۋ ساعاتتارىنىڭ % 60-70- دان كەم ەمەس، (وقۋ مەرزىمى 3,5 جىل) كولەمىندە بىلىكتى تالىمگەردىڭ باسشىلىعىمەن ەمحانالىق بازادا وندىرىستىك پراكتيكانى جۇزەگە اسىرۋ دا بار. اتالعان باعدارلاما ەۋرووداق ەلدەرىندە كەڭىنەن تارالعان، سونىمەن قاتار، پراكتيكالىق ازىرلىگى باسىم جوعارى بىلىكتى مەيىرگەرلەردى دايىنداۋعا باعىتتالعان.
ۆەدومستۆودا ايتىپ وتكەندەي، «مەيىرگەرلىك ءىس» ماماندىعى بويىنشا قولدانبالى باكالاۆريات جوعارعى مەديتسينالىق كوللەدج تۇلەكتەرى اۋرۋلاردى دارىگەرگە دەيىنگى تەكسەرۋ، الدىن الا دياگنوز قويۋ، بەيىندى ماماندارىنا كونسۋلتاتسياعا باعىتتاۋ، بالالار جانە ەرەسەك تۇرعىندار پاتروناجى، دارىگەردىڭ باقىلاۋىمەن دارىلىك تاعايىنداۋلاردى جازۋ سىندى مەيىرگەرلىك قابىلداۋ ءۇشىن كاسىبي ماشىقتاردى يگەرىپ شىعادى.
قازىرگى تاڭدا فين جانە وتاندىق ماماندار «مەيىرگەرلىك ءىس» ماماندىعى بويىنشا قولدانبالى باكالاۆرياتتىڭ بىرىكتىرىلگەن باعدارلاماسىن ازىرلەۋدە. اتالعان باعدارلاما بويىنشا بۇدان بۇرىن ءبىلىم العان مەيىرگەرلەر ءبىر جارىم جىلدىڭ ىشىندە قوسىمشا وقۋ ارقىلى ءوز كاسىبي ماشىقتارىن دامىتا الادى.
ەسكە سالا كەتەيىك، قازىرگى تاڭدا قازاقستاندا 26 مەملەكەتتىك جانە 37 جەكە مەديتسينالىق كوللەدج بار. ولار جىل سايىن ورتا ەسەپپەن 12 مىڭ ورتا بۋىن مەديتسينالىق قىزمەتكەر دايىندايدى. بۇگىندە ورتا مەديتسينالىق پەرسونال سالا قىزمەتكەرلەرىنىڭ ەڭ كوپ ساناتىن قۇرايدى، ولاردىڭ سانى شامامەن 160 مىڭ مامان.
